امریکا ایران امن مذاکرات کی امید، عالمی منڈی میں تیل سستا

امریکا اور ایران کے درمیان ممکنہ امن معاہدے سے متعلق مثبت پیش رفت کی خبروں کے بعد عالمی منڈی میں خام تیل کی قیمتوں میں نمایاں کمی دیکھی گئی ہے۔ سرمایہ کاروں کو توقع ہے کہ اگر دونوں ممالک کسی معاہدے پر پہنچ جاتے ہیں تو آبنائے ہرمز میں بحری آمدورفت بحال ہوسکتی ہے، جس سے مشرقِ وسطیٰ سے تیل کی ترسیل میں بہتری آئے گی اور عالمی توانائی مارکیٹ پر دباؤ کم ہوگا۔

پیر کے روز برینٹ کروڈ کی قیمت تقریباً 4.5 فیصد کمی کے بعد 98 ڈالر 83 سینٹ فی بیرل تک گر گئی، جبکہ امریکی خام تیل ویسٹ ٹیکساس انٹرمیڈیٹ 92 ڈالر 3 سینٹ فی بیرل پر آگیا۔ دونوں اہم آئل بینچ مارکس دورانِ تجارت دو ہفتوں کی کم ترین سطح تک بھی پہنچے۔

تجزیہ کاروں کے مطابق مارکیٹ میں یہ گراوٹ امریکا اور ایران کے درمیان جاری سفارتی رابطوں اور ممکنہ معاہدے کی امید کے باعث سامنے آئی۔ امریکی صدر ڈونلڈ ٹرمپ نے حالیہ بیان میں مذاکرات میں نمایاں پیش رفت کا عندیہ دیا تھا، جس کے بعد سرمایہ کاروں کے اعتماد میں اضافہ دیکھنے میں آیا۔

ماہرین کا کہنا ہے کہ اگر آبنائے ہرمز دوبارہ مکمل طور پر فعال ہوجاتی ہے تو عالمی سطح پر تیل اور ایل این جی کی ترسیل میں نمایاں بہتری آسکتی ہے، کیونکہ عالمی توانائی سپلائی کا بڑا حصہ اسی راستے سے گزرتا ہے۔

تاہم مبصرین کے مطابق دونوں ممالک کے درمیان اب بھی کئی اہم معاملات حل طلب ہیں اور کسی بھی حتمی معاہدے تک پہنچنے میں وقت لگ سکتا ہے۔ ماہرین نے خبردار کیا ہے کہ اگر معاہدہ ہوجائے تب بھی متاثرہ تنصیبات کی بحالی اور سپلائی چین کو مکمل طور پر معمول پر آنے میں کئی ماہ درکار ہوسکتے ہیں۔

عالمی مالیاتی منڈیوں میں بھی اس پیش رفت کا اثر دیکھا گیا۔ یورو اور جاپانی ین میں بہتری ریکارڈ کی گئی جبکہ امریکی ڈالر کی قدر میں کچھ کمی آئی۔ دوسری جانب امریکی اسٹاک مارکیٹ کے فیوچر انڈیکسز بھی مثبت زون میں ٹریڈ کرتے رہے۔