آیت اللہ علی خامنہ ای کی آخری رسومات جاری، مجتبیٰ خامنہ ای کی عدم شرکت پر قیاس آرائیاں

تہران میں آیت اللہ علی خامنہ ای کی آخری رسومات کا سلسلہ جاری ہے، تاہم ان کے صاحبزادے مجتبیٰ خامنہ ای کی عدم موجودگی نے مختلف قیاس آرائیوں کو جنم دیا ہے۔
بین الاقوامی میڈیا رپورٹس کے مطابق مجتبیٰ خامنہ ای گزشتہ کئی ماہ سے کسی عوامی تقریب میں نظر نہیں آئے۔ بعض غیر ملکی ذرائع نے دعویٰ کیا ہے کہ وہ سیکیورٹی خدشات کے باعث اپنے والد کی آخری رسومات میں شریک نہیں ہو رہے، تاہم اس حوالے سے ایرانی حکام کی جانب سے کوئی باضابطہ تصدیق یا تردید سامنے نہیں آئی۔
رپورٹس میں یہ بھی کہا گیا ہے کہ مجتبیٰ خامنہ ای نے مشہد میں ہونے والی تدفین میں شرکت کی خواہش ظاہر کی تھی، لیکن مبینہ طور پر سیکیورٹی خدشات کے پیشِ نظر انہیں اجازت نہیں دی گئی۔ ان اطلاعات کی آزاد ذرائع سے تصدیق نہیں ہو سکی۔
غیر ملکی میڈیا نے یہ دعویٰ بھی کیا ہے کہ حالیہ کشیدگی کے دوران ہونے والے ایک حملے میں مجتبیٰ خامنہ ای کے اہلِ خانہ کے دو افراد جاں بحق ہوئے تھے، تاہم اس بارے میں بھی ایرانی حکام کی جانب سے باضابطہ تصدیق سامنے نہیں آئی۔
دوسری جانب تہران میں جاری تعزیتی تقریبات میں ایران کے صدر مسعود پزشکیان، پارلیمنٹ کے اسپیکر محمد باقر قالیباف، عدلیہ کے اعلیٰ حکام اور پاسدارانِ انقلاب کے سینئر کمانڈرز سمیت متعدد سرکاری شخصیات شریک ہیں۔