اینڈرائیڈ بمقابلہ آئی فون: کس کا اسکیم پروٹیکشن زیادہ طاقتور؟

حال ہی میں کی گئی ایک بین الاقوامی تحقیق سے معلوم ہوا ہے کہ اینڈرائیڈ اسمارٹ فونز، خاص طور پر گوگل پکسل ڈیوائسز، موبائل فراڈ اور اسکیم میسجز کے خلاف زیادہ مؤثر ثابت ہو رہے ہیں۔

یہ تحقیق یوگو کے تعاون سے کی گئی، جس میں امریکا، بھارت اور برازیل کے پانچ ہزار اسمارٹ فون صارفین سے رائے لی گئی۔ سروے گوگل کے اشتراک سے انجام پایا۔

نتائج کے مطابق، آئی فون صارفین کے تین یا اس سے زیادہ اسکیم میسجز موصول ہونے کا امکان 65 فیصد زیادہ تھا، جب کہ اینڈرائیڈ صارفین میں 58 فیصد زیادہ امکان تھا کہ انہیں کوئی اسکیم پیغام موصول نہ ہو۔ ماہرین کے مطابق، یہ فرق اینڈرائیڈ کے جدید بلٹ اِن اسکیم پروٹیکشن فیچرز کی بدولت ہے۔

سروے میں یہ بھی دیکھا گیا کہ اینڈرائیڈ صارفین آئی فون صارفین کے مقابلے میں 20 فیصد زیادہ مطمئن ہیں کہ ان کے فون کا اسکیم پروٹیکشن نظام مؤثر طور پر کام کرتا ہے۔
سب سے نمایاں کارکردگی گوگل پکسل فونز کی رہی، جن کے صارفین میں جعلی پیغامات موصول ہونے کے امکانات نہ ہونے کے برابر پائے گئے۔

رپورٹ میں چار معروف فلیگ شپ ڈیوائسز — گوگل پکسل 10 پرو، آئی فون 17 پرو، سام سنگ گلیکسی زی فولڈ 7 اور موٹوروولا رازر+ 2025 — کے اسکیم پروٹیکشن فیچرز کا موازنہ بھی شامل تھا۔ نتائج کے مطابق، آئی فون اس شعبے میں سب سے پیچھے رہا۔

ماہرین کا کہنا ہے کہ اینڈرائیڈ کے اندرونی سیکیورٹی ٹولز جیسے کال اسکریننگ، ریئل ٹائم اسکیم ڈیٹیکشن، اور اے آئی پر مبنی میسج اینالیسس صارفین کے تحفظ میں اہم کردار ادا کر رہے ہیں۔
گوگل میسجز ایپ نامعلوم بھیجنے والوں کے مشکوک پیغامات اور خطرناک لنکس کو خودکار طور پر بلاک کرتی ہے، جب کہ گوگل فون ایپ معروف اسپیم کالز کو خود بخود فلٹر کر دیتی ہے۔

کچھ مارکیٹوں میں، کال اسکرین فیچر مشکوک کالز کو صارف کی جانب سے جواب دینے سے پہلے ہی فلٹر کر دیتا ہے، اور اگر کال اٹھا بھی لی جائے تو سسٹم ممکنہ خطرناک رویے کی فوری نشاندہی کرتا ہے۔

تحقیق کے مطابق، اگرچہ آئی فون کو عمومی طور پر زیادہ محفوظ تصور کیا جاتا ہے، لیکن حالیہ نتائج ظاہر کرتے ہیں کہ اینڈرائیڈ فونز، خاص طور پر گوگل پکسل سیریز، موبائل اسکیمز اور فراڈ سے بچاؤ میں زیادہ فعال اور مؤثر ثابت ہو رہے ہیں۔