ایپسٹین کی مبینہ وارث ڈینٹسٹ خاتون دوبارہ خبروں میں، نئی دستاویزات میں اہم انکشافات

واشنگٹن: امریکا کے سزا یافتہ جنسی مجرم اور سرمایہ کار جیفری ایپسٹین کی سابق قریبی ساتھی ڈاکٹر کیرینا شولیاک ایک بار پھر توجہ کا مرکز بن گئی ہیں۔ امریکی محکمہ انصاف کی جانب سے جاری ہونے والی لاکھوں صفحات پر مشتمل تحقیقاتی دستاویزات میں ان کے اور ایپسٹین کے تعلقات سے متعلق متعدد نئی تفصیلات سامنے آئی ہیں۔

دستاویزات کے مطابق ایپسٹین نے 2019 میں اپنی موت سے قبل تقریباً 100 ملین امریکی ڈالر مالیت کے ایک ٹرسٹ میں کیرینا شولیاک کو بنیادی وارث نامزد کیا تھا۔ تاہم قانونی کارروائیوں اور اثاثوں کے منجمد ہونے کے باعث امکان ظاہر کیا جا رہا ہے کہ ان اثاثوں کا بڑا حصہ متاثرین کو معاوضے کی ادائیگی کے لیے استعمال ہوگا۔

رپورٹس کے مطابق بیلاروس سے امریکا آنے والی کیرینا شولیاک کی ایپسٹین سے ملاقات 2011 میں ہوئی۔ بعد ازاں انہوں نے دندان سازی کی تعلیم مکمل کی اور مختلف امریکی ریاستوں میں پیشہ ورانہ لائسنس حاصل کیے، جن مراحل میں ایپسٹین کی مالی اور انتظامی معاونت کا بھی ذکر کیا گیا ہے۔

تحقیقاتی ریکارڈ میں بتایا گیا ہے کہ شولیاک ایپسٹین کی مختلف جائیدادوں، ملازمین اور دیگر انتظامی امور میں کردار ادا کرتی تھیں۔ وہ امریکی ورجن آئی لینڈز سمیت متعدد مقامات پر ان کی جائیدادوں کے انتظام سے وابستہ رہیں اور ان کے نجی طیارے میں بھی سفر کرتی تھیں۔

دستاویزات کے مطابق ایپسٹین نے شولیاک اور ان کے خاندان کو مالی مدد فراہم کی، جبکہ ان کی والدہ کے علاج کے اخراجات بھی برداشت کیے۔ بعض ای میلز میں شولیاک کی جانب سے ایپسٹین کا شکریہ ادا کرنے اور ان کے لیے جذباتی وابستگی کا اظہار بھی سامنے آیا ہے۔

ریکارڈ میں یہ بھی ذکر کیا گیا ہے کہ شولیاک ایپسٹین کی بعض ذاتی سرگرمیوں سے آگاہ تھیں، تاہم امریکی حکام نے ان پر ایپسٹین کے جنسی جرائم یا انسانی اسمگلنگ میں ملوث ہونے کا کوئی الزام عائد نہیں کیا۔ دستیاب دستاویزات کے مطابق انہیں شریکِ جرم قرار نہیں دیا گیا اور نہ ہی ان سے اس حوالے سے باضابطہ تفتیش کی گئی۔

ایپسٹین کی وفات کے بعد کیرینا شولیاک نے عوامی زندگی سے دوری اختیار کرتے ہوئے بطور ڈینٹسٹ اپنا پیشہ جاری رکھا۔ تاہم نئی سرکاری دستاویزات منظرعام پر آنے کے بعد وہ ایک بار پھر میڈیا کی توجہ کا مرکز بن گئی ہیں۔

تازہ دستاویزات میں ان کے خلاف کوئی نیا مجرمانہ الزام شامل نہیں، البتہ ان سے یہ ضرور ظاہر ہوتا ہے کہ ان کی تعلیم، پیشہ ورانہ زندگی اور مالی معاملات پر جیفری ایپسٹین کا نمایاں اثر موجود تھا۔