امریکا میں پاکستان کے سفیر رضوان سعید شیخ نے ریاست انڈیانا میں قائم ایک معروف ٹیکسٹائل کمپنی کا دورہ کیا، جہاں انہیں ادارے کے آپریشنز، جدید گوداموں، مصنوعات کی ترسیل کے نظام اور پاکستان کے ساتھ تجارتی تعلقات کے بارے میں بریفنگ دی گئی۔
دورے کے دوران پاکستانی سفیر نے کمپنی کے ہیڈکوارٹرز اور ڈسٹری بیوشن سینٹر کا معائنہ کیا۔ کمپنی حکام نے انہیں صحت اور طبی شعبوں کے لیے تیار کی جانے والی ٹیکسٹائل مصنوعات، سپلائی نیٹ ورک اور کاروباری سرگرمیوں سے آگاہ کیا۔
رضوان سعید شیخ نے پاکستان اور امریکی کمپنی کے درمیان جاری تجارتی تعاون کو سراہتے ہوئے کہا کہ یہ تعلقات پاکستان کی ٹیکسٹائل صنعت کے معیار، پیداواری صلاحیت اور عالمی مارکیٹ میں مسابقت کی عکاسی کرتے ہیں۔
انہوں نے کہا کہ پاکستان اور امریکا کے نجی شعبوں کے درمیان مضبوط کاروباری روابط دونوں ممالک کے معاشی تعاون کو مزید فروغ دے سکتے ہیں۔ حکومت پاکستان کاروباری آسانیوں، شفافیت اور اقتصادی اصلاحات کے ذریعے غیر ملکی سرمایہ کاری اور دوطرفہ تجارت کے مواقع بڑھانے کے لیے اقدامات کر رہی ہے۔
پاکستانی سفیر نے اس امید کا اظہار کیا کہ ٹیکسٹائل سمیت مختلف شعبوں میں تعاون کے نئے امکانات پیدا ہوں گے، جس سے دونوں ممالک کے کاروباری اداروں کو فائدہ پہنچے گا اور روزگار کے مزید مواقع پیدا ہونگے۔
Leave a reply
ہاٹ لائن نیوز پر شائع ہونے والی تمام خبریں، رپورٹس، تصاویر اور وڈیوز ہماری رپورٹنگ ٹیم اور مانیٹرنگ ذرائع سے حاصل کی گئی ہیں۔ ان کو پبلش کرنے سے پہلے اسکے مصدقہ ذرائع کا ہرممکن خیال رکھا گیا ہے، تاہم کسی بھی خبر یا رپورٹ میں ٹائپنگ کی غلطی یا غیرارادی طور پر شائع ہونے والی غلطی کی فوری اصلاح کرکے اسکی تردید یا درستگی فوری طور پر ویب سائٹ پر شائع کردی جاتی ہے۔