یو اے ای نے پاکستانی شہریوں کے لیے وزٹ ویزا کے اجرا میں نرمی کردی

متحدہ عرب امارات (یو اے ای) نے کئی ماہ سے جاری غیر یقینی صورتحال کے بعد پاکستانی شہریوں کے لیے وزٹ ویزا کے اجرا میں آسانی پیدا کرتے ہوئے رجسٹرڈ ٹریول ایجنسیوں کے ذریعے درخواستیں دوبارہ قبول کرنا شروع کر دی ہیں۔

ٹریول انڈسٹری سے وابستہ ذرائع کے مطابق فیملی ٹورازم اور رشتہ داروں سے ملاقات کے مقصد سے سفر کرنے والے پاکستانی شہریوں کو اب پہلے کے مقابلے میں زیادہ آسانی سے وزٹ ویزے مل رہے ہیں۔ اس کے ساتھ ساتھ سیاحتی سرگرمیوں کے فروغ کے لیے مہمات بھی دوبارہ شروع کی جا رہی ہیں، جبکہ خطے میں حالیہ حالات کے باعث متاثر ہونے والی فضائی پروازیں بھی بتدریج معمول پر آ رہی ہیں۔

امیگریشن حکام کے مطابق پاکستان سے دبئی جانے والے مسافروں کی تعداد میں بھی اضافہ دیکھنے میں آیا ہے۔ گرمیوں کے آغاز میں جہاں روزانہ تقریباً 170 افراد سفر کر رہے تھے، وہیں جولائی کے آخر تک یہ تعداد تقریباً 400 تک پہنچ گئی۔ تاہم یہ تعداد اب بھی چند سال قبل کے مقابلے میں کم ہے۔

ٹریول ایجنٹس کا کہنا ہے کہ ماضی میں انفرادی درخواست گزاروں کو ویزا حاصل کرنے میں مشکلات کا سامنا تھا، لیکن حالیہ ہفتوں میں خاص طور پر خاندانوں کی درخواستوں کی منظوری میں بہتری آئی ہے۔

اسلام آباد میں یو اے ای سفارت خانے سے وابستہ ایک عہدیدار نے بھی تصدیق کی کہ رجسٹرڈ ٹریول ایجنسیوں کے ذریعے مکمل دستاویزات کے ساتھ جمع کرائی جانے والی درخواستوں پر معمول کے مطابق کارروائی کی جا رہی ہے۔ ان کے مطابق ماضی میں سیکیورٹی اور دستاویزات کی تصدیق کے باعث ویزا پراسیسنگ میں تاخیر ہوتی رہی، تاہم اب صورتحال بہتر ہو رہی ہے۔