پھیپھڑوں کی صحت بہتر بنانے کے لیے روزانہ کتنی دیر چہل قدمی کرنی چاہیے؟

ماہرین صحت کے مطابق روزانہ کی بنیاد پر چہل قدمی نہ صرف دل بلکہ پھیپھڑوں کی کارکردگی بہتر بنانے میں بھی اہم کردار ادا کرتی ہے۔ جسمانی سرگرمی کی کمی، فضائی آلودگی، تمباکو نوشی اور غیر صحت مند طرزِ زندگی پھیپھڑوں کی صلاحیت کو متاثر کر سکتے ہیں، اس لیے روزمرہ معمولات میں ورزش کو شامل کرنا ضروری ہے۔

طبی ماہرین کا کہنا ہے کہ صحت مند افراد کو پھیپھڑوں کی بہتر کارکردگی کے لیے روزانہ تقریباً 30 سے 45 منٹ تک تیز قدموں سے واک کرنی چاہیے۔ تاہم جو افراد ورزش کے عادی نہیں ہیں وہ ابتدا میں 15 سے 20 منٹ کی ہلکی چہل قدمی سے آغاز کر کے بتدریج وقت بڑھا سکتے ہیں۔

باقاعدگی سے واک کرنے سے جسم میں خون کی روانی بہتر ہوتی ہے، آکسیجن لینے کی صلاحیت میں اضافہ ہوتا ہے اور جسمانی برداشت مضبوط ہوتی ہے۔ ماہرین کے مطابق روزانہ تیز رفتاری سے چلنے والے افراد میں سانس سے متعلق بعض مسائل کا امکان کم ہو سکتا ہے۔

صحت مند پھیپھڑوں کے لیے صرف ورزش کافی نہیں بلکہ مجموعی طرزِ زندگی میں بہتری بھی ضروری ہے۔ ماہرین تمباکو نوشی سے پرہیز، متوازن غذا، مناسب پانی کا استعمال، اچھی نیند، وزن کو قابو میں رکھنے اور سانس کی مشقوں کو بھی فائدہ مند قرار دیتے ہیں۔

ماہرین صحت نے خبردار کیا ہے کہ مسلسل کھانسی، سانس لینے میں دشواری، سینے میں درد، بار بار سانس کی بیماری یا کھانسی کے دوران خون آنے جیسی علامات کو نظر انداز نہیں کرنا چاہیے۔ ایسی صورت میں فوری طور پر ڈاکٹر سے رجوع کرنا ضروری ہے تاکہ بروقت تشخیص اور علاج ممکن ہو سکے۔

یہ معلومات عمومی آگاہی کے لیے ہیں۔ کسی بھی بیماری یا صحت کے مسئلے کی صورت میں ورزش یا معمولات میں تبدیلی سے پہلے ماہر ڈاکٹر سے مشورہ کرنا بہتر ہے۔