چین میں پیوٹن کا نیوکلیئر بریف کیس خبروں کی زینت بن گیا

شینژن: روسی صدر ولادیمیر پیوٹن کے دورہ چین کے دوران ان کے ہمراہ موجود ایک خصوصی سیاہ بریف کیس عالمی میڈیا کی توجہ کا مرکز بن گیا، جسے روس کے جوہری کمانڈ اینڈ کنٹرول نظام کا اہم حصہ قرار دیا جاتا ہے۔
میڈیا رپورٹس کے مطابق روسی وفد کے ساتھ موجود ایک صحافی نے صدر پیوٹن کے ہمراہ چلنے والے فوجی اہلکار کے ہاتھ میں سیاہ بیگ دیکھ کر اس کی نوعیت دریافت کی۔ صحافی کے سوال پر اہلکار نے تصدیق کی کہ یہ روس کا جوہری بریف کیس ہے۔
روسی نظام میں اس خصوصی بریف کیس کو چیگیٹ (Cheget) کہا جاتا ہے۔ یہ جوہری ہتھیاروں کے استعمال سے متعلق اعلیٰ سطح کے فیصلوں اور احکامات کی ترسیل کے لیے قائم مواصلاتی نظام کا حصہ ہے۔
ماہرین کے مطابق یہ بریف کیس براہ راست جوہری میزائل داغنے کا آلہ نہیں بلکہ روسی صدر اور اعلیٰ فوجی قیادت کے درمیان محفوظ رابطے کا ذریعہ ہے۔ صدر کے بیرون ملک دوروں کے دوران بھی فوجی اہلکار اسے اپنے ہمراہ رکھتے ہیں تاکہ اہم مواصلاتی نظام تک رسائی برقرار رہے۔
پیوٹن کے ساتھ اس بریف کیس کی موجودگی ایسے وقت میں سامنے آئی ہے جب روس، امریکا اور چین کی اعلیٰ قیادت کے درمیان اہم ملاقاتوں اور عالمی معاملات پر مشاورت جاری ہے۔
توقع کی جا رہی ہے کہ ان ملاقاتوں میں یوکرین جنگ، ایران کی صورت حال، عالمی تجارت، مصنوعی ذہانت اور جوہری سلامتی جیسے اہم موضوعات زیر بحث آئیں گے۔
کریملن کے ترجمان دمتری پیسکوف کے مطابق مجوزہ مذاکرات میں بین الاقوامی صورت حال، یوکرین تنازع اور ایران سے متعلق پیش رفت کو بھی اہمیت دی جائے گی۔
روس کے جوہری کمانڈ سسٹم سے وابستہ بریف کیس کی موجودگی نے عالمی توجہ اس جانب مبذول کرائی ہے کہ بڑی جوہری طاقتوں کے درمیان سفارتی رابطوں کے دوران قومی سلامتی اور دفاعی نظام کس قدر اہمیت رکھتے ہیں۔








