حوثیوں کی دھمکی کے بعد سعودی تیل بردار ٹینکرز کا راستہ تبدیل، خام تیل مہنگا

یمن کے حوثی گروہ کی جانب سے سعودی عرب سے تیل کی ترسیل کرنے والے بحری جہازوں کو نشانہ بنانے کی دھمکی کے بعد بحرِ احمر سے ایشیا جانے والے سعودی خام تیل کے دو بڑے ٹینکرز نے اپنا سفر روک کر واپس رخ کر لیا۔

رپورٹس کے مطابق حوثیوں نے جہاز رانی سے وابستہ کمپنیوں کو خبردار کیا ہے کہ سعودی تیل کی لوڈنگ یا ان لوڈنگ میں شامل کسی بھی جہاز کو ہدف بنایا جا سکتا ہے۔

اس پیش رفت پر امریکی صدر ڈونلڈ ٹرمپ نے کہا کہ فی الحال ایسا کوئی واقعہ پیش نہیں آیا، تاہم اگر صورتحال پیدا ہوئی تو اس سے نمٹا جائے گا۔

خطے میں بڑھتی ہوئی کشیدگی کے اثرات عالمی منڈی پر بھی ظاہر ہوئے، جہاں خام تیل کی قیمت دو فیصد سے زیادہ اضافے کے بعد 91 ڈالر فی بیرل سے تجاوز کر گئی۔

رپورٹس میں یہ بھی بتایا گیا ہے کہ خطے میں جاری تنازع کے باعث ایران، کویت، بحرین اور اردن میں موجود امریکی عسکری تنصیبات کو بھی حملوں کا سامنا ہے۔

ایرانی وزارتِ صحت کے ایک عہدیدار کے مطابق حالیہ امریکی حملوں میں 50 شہری ہلاک اور 500 زخمی ہوئے ہیں۔ دوسری جانب امریکی وزیرِ دفاع پیٹ ہیگسیٹھ نے سینیٹ میں بتایا کہ جنگی اخراجات اب تک 37.5 ارب ڈالر تک پہنچ چکے ہیں، جبکہ میزائلوں کے ذخائر کی بحالی کے لیے مزید 70 ارب ڈالر کی درخواست کی گئی ہے۔

ادھر سفارتی سطح پر بھی رابطے جاری ہیں۔ ایرانی وزیرِ داخلہ اسکندر مومنی نے پاکستان کا دورہ کرتے ہوئے اسلام آباد سے خطے میں کشیدگی کم کرنے اور ثالثی کی کوششیں جاری رکھنے کی اپیل کی۔