جاپانی تحقیق نے چہل قدمی سے متعلق حیران کن رجحان بے نقاب کر دیا

ایک نئی سائنسی تحقیق میں معلوم ہوا ہے کہ جب لوگوں کو کسی مخصوص سمت کی ہدایت دیے بغیر چلنے کے لیے کہا جائے تو ان میں سے اکثریت گھڑی کی سوئی کی حرکت کے برعکس، یعنی کاؤنٹر کلاک وائز سمت میں چلنا پسند کرتی ہے۔
یہ تحقیق جاپان کے ٹوکیو میں قائم ایک تحقیقی ٹیم نے انجام دی، جس کا مقصد ابتدا میں کووڈ-19 کے دوران سماجی فاصلے سے متعلق انسانی رویوں کا جائزہ لینا تھا۔ تاہم تجربات کے دوران محققین نے ایک دلچسپ رجحان نوٹ کیا۔
تحقیق کے مطابق مختلف گروہوں پر کیے گئے 33 تجرباتی مشاہدات میں سے 32 مواقع پر شرکاء نے کاؤنٹر کلاک وائز سمت اختیار کی۔ یہ رجحان مختلف ممالک اور پس منظر رکھنے والے افراد میں بھی یکساں طور پر دیکھا گیا۔
محققین کا کہنا ہے کہ یہ نتیجہ ان کے لیے غیر متوقع تھا، کیونکہ اس رجحان کا تعلق نہ تو افراد کے دائیں یا بائیں ہاتھ کے استعمال سے نظر آیا اور نہ ہی غالب پیر سے۔
تحقیق میں شامل ماہرین کے مطابق نوجوان افراد کے رویوں میں معمولی فرق ضرور دیکھا گیا، تاہم مجموعی طور پر زیادہ تر افراد نے ایک ہی سمت کو ترجیح دی۔
سائنس دانوں کا کہنا ہے کہ فی الحال اس رجحان کی اصل وجہ واضح نہیں ہو سکی، لیکن اس کے پس منظر کو سمجھنے سے انسانی فطرت اور اجتماعی رویوں کے بارے میں نئی معلومات حاصل ہو سکتی ہیں۔
اس تحقیق کے نتائج معروف سائنسی جریدے “نیچر کمیونیکیشنز” میں شائع کیے گئے ہیں۔