ایکس پر نئی پابندیاں، غیر پریمیم صارفین کی سرگرمی محدود

سوشل میڈیا پلیٹ فارم ”ایکس“ نے اپنے مفت (غیر پریمیم) صارفین کے لیے نئی حدود نافذ کر دی ہیں، جن کے تحت روزانہ پوسٹس اور جوابات کی تعداد کم کر دی گئی ہے۔ کمپنی کے مطابق اس اقدام کا مقصد پلیٹ فارم پر بوٹس کی سرگرمیوں کو محدود کرنا اور اسپام یا غیر ضروری مواد کی روک تھام ہے۔
نئی پالیسی کے تحت مفت صارفین اب ایک دن میں زیادہ سے زیادہ 50 اصل پوسٹس کر سکیں گے، جبکہ پہلے یہ حد اس سے کہیں زیادہ تھی۔ اسی طرح روزانہ 200 جوابات (ریپلائیز) کی اجازت ہوگی۔ براہِ راست پیغامات کی حد 500 روزانہ اور نئے اکاؤنٹس کو فالو کرنے کی حد 400 برقرار رکھی گئی ہے۔ اس کے علاوہ ای میل ایڈریس تبدیل کرنے کی اجازت بھی محدود کر دی گئی ہے، جس کے مطابق ایک گھنٹے میں صرف چند بار ہی تبدیلی ممکن ہوگی۔
رپورٹس کے مطابق یہ تبدیلیاں اس لیے کی گئی ہیں تاکہ خودکار اکاؤنٹس اور اسپام سرگرمیوں کو روکا جا سکے اور پلیٹ فارم کو زیادہ محفوظ اور صاف بنایا جا سکے۔ کمپنی کا مؤقف ہے کہ اس سے حقیقی صارفین کو بہتر تجربہ ملے گا اور غیر ضروری مواد میں کمی آئے گی۔
اعداد و شمار کے مطابق زیادہ تر صارفین پلیٹ فارم پر صرف مواد دیکھنے تک محدود رہتے ہیں، اس لیے ان تبدیلیوں کا عام صارفین پر زیادہ اثر نہیں پڑے گا۔ تاہم وہ صارفین جو دن بھر بہت زیادہ سرگرم رہتے ہیں، جیسے صحافی، ڈیجیٹل تخلیق کار اور برانڈ مینیجرز، ان کے لیے یہ پابندیاں زیادہ اہم ہو سکتی ہیں اور ممکن ہے کہ انہیں پریمیم سبسکرپشن کی طرف جانا پڑے۔
اگر کوئی غیر تصدیق شدہ صارف مقررہ حد سے زیادہ سرگرمی کرنے کی کوشش کرے گا تو اسے سسٹم کی جانب سے اطلاع دی جائے گی اور اسے عارضی طور پر انتظار کرنا ہوگا یا پھر پریمیم سہولت اختیار کرنا ہوگی۔