بشریٰ بی بی کی بیٹی کی اڈیالہ جیل میں ملاقات متوقع، سیاسی کشیدگی کم کرنے کی کوششیں جاری

اسلام آباد: ذرائع کے مطابق بشریٰ بی بی کی بیٹی کو جلد اڈیالہ جیل میں اپنی والدہ سے ملاقات کی اجازت ملنے کا امکان ہے۔ بتایا جا رہا ہے کہ یہ پیشرفت پسِ پردہ رابطوں اور کشیدگی کم کرنے کی کوششوں کا نتیجہ ہے۔
ذرائع کا کہنا ہے کہ متعلقہ حکام سے غیر رسمی سطح پر رابطوں کے بعد ملاقات کی راہ ہموار ہونے کی توقع ہے۔ اس سے قبل بھی بشریٰ بی بی کی بیٹی نے جیل میں ملاقات کی تھی، تاہم بعد میں ملاقات سے متعلق معلومات منظرِ عام پر آنے کے بعد مزید ملاقاتوں میں مشکلات پیش آئیں۔
اطلاعات کے مطابق حکام کی جانب سے اس بات پر تحفظات ظاہر کیے گئے تھے کہ ملاقاتوں کی تفصیلات عوامی سطح پر زیرِ بحث نہ لائی جائیں۔ اسی تناظر میں عمران خان کی بہنوں کی ملاقاتوں کے حوالے سے بھی کوششیں جاری ہیں، جبکہ امکان ظاہر کیا جا رہا ہے کہ اہلِ خانہ سے بعض معاملات پر یقین دہانی طلب کی جا سکتی ہے۔
دوسری جانب ذرائع نے دعویٰ کیا ہے کہ خیبر پختونخوا کے وزیرِ اعلیٰ سہیل آفریدی کے بعض حالیہ بیانات پر بھی سرکاری حلقوں میں تشویش پائی جاتی ہے۔ یہ تحفظات مبینہ طور پر ایک عوامی اجتماع اور غیر ملکی صحافیوں سے ملاقات کے دوران دیے گئے بیانات کے بعد سامنے آئے۔
ذرائع کے مطابق یہ معاملہ پاکستان تحریکِ انصاف کی قیادت تک بھی پہنچایا گیا ہے۔ تاہم پی ٹی آئی چیئرمین بیرسٹر گوہر علی خان نے اس حوالے سے تبصرہ کرنے سے گریز کیا۔
مبصرین کے مطابق حالیہ پیشرفت کو سیاسی درجہ حرارت کم کرنے اور اعتماد سازی کی کوششوں کا حصہ قرار دیا جا رہا ہے۔