میٹ گالا 2026 کے قریب آتے ہی ”میٹ گالا کرس“ کی بحث دوبارہ گرم

جیسے جیسے فیشن کی دنیا کے سب سے بڑے ایونٹ میٹ گالا 2026 کا وقت قریب آ رہا ہے، ایک بار پھر سوشل میڈیا اور مداحوں میں ایک پرانی مگر دلچسپ بحث زور پکڑ رہی ہے جسے عام طور پر ”میٹ گالا کرس“ یا بدشگونی سے تعبیر کیا جاتا ہے۔

یہ نظریہ کوئی نیا نہیں، مگر ہر سال ایونٹ کے قریب آتے ہی دوبارہ خبروں اور گفتگو کا حصہ بن جاتا ہے۔ اس تصور کے مطابق اگر کوئی مشہور جوڑا میٹ گالا میں ایک ساتھ نظر آئے یا اپنی محبت کا کھل کر اظہار کرے تو ان کے تعلق کے جلد ختم ہونے کا امکان بڑھ جاتا ہے۔ تاہم اس بات کی کوئی سائنسی یا مستند بنیاد موجود نہیں۔

ماضی کے چند مشہور مثالیں

گزشتہ برسوں میں کئی ہائی پروفائل جوڑوں کے حوالے سے اس دعوے کو جوڑا جاتا رہا ہے۔
مثال کے طور پر بیلا حدید اور دی ویکنڈ نے 2016 میں میٹ گالا میں شرکت کی، جس کے بعد ان کا رشتہ کچھ عرصے میں ختم ہوگیا، اگرچہ بعد میں دونوں کے درمیان وقفے وقفے سے تعلق رہا۔

اسی طرح دی ویکنڈ اور سیلینا گومز نے بھی اسی ایونٹ میں ایک ساتھ شرکت کی تھی، مگر ان کا رشتہ زیادہ دیر برقرار نہ رہ سکا۔

2018 میں ہیلی بیبر اور شان مینڈیز کی میٹ گالا میں مشترکہ موجودگی بھی خبروں میں رہی، تاہم بعد میں دونوں الگ ہوگئے۔ اسی سال ایلون مسک اور گریمز نے بھی ایونٹ میں پہلی بار بطور جوڑا شرکت کی، مگر ان کا تعلق بھی وقت کے ساتھ ختم ہوگیا۔

بعد ازاں کم کارڈیشین اور پیٹ ڈیوڈسن نے 2022 میں میٹ گالا میں بطور جوڑا شرکت کی، لیکن چند ماہ بعد ان کی علیحدگی ہوگئی۔ اسی طرح کچھ دیگر مشہور جوڑوں کی مثالیں بھی اس بحث کا حصہ بنائی جاتی ہیں۔

حقیقت کیا ہے؟

ماہرین اور مبصرین کے مطابق یہ تمام باتیں محض اتفاقات ہیں اور ان کا میٹ گالا سے کوئی براہ راست تعلق ثابت نہیں کیا جا سکتا۔ اس تصور کو زیادہ تر سوشل میڈیا اور مداحوں کی دلچسپی نے مقبول بنایا ہے۔

اس کے برعکس کئی مشہور جوڑے آج بھی مضبوط رشتے میں ہیں، جن میں ریحانہ اور اے ایس اے پی راکی اور پریانکا چوپڑا اور نک جونس جیسے نام شامل ہیں، جو اس نظریے کی نفی کرتے ہیں۔

میٹ گالا 2026 کی تیاریاں

ادھر میٹ گالا 2026 کی تیاریاں زور و شور سے جاری ہیں۔ اس سال کا تھیم ”فیشن از آرٹ“ رکھا گیا ہے، جس نے مداحوں اور فیشن انڈسٹری میں مزید تجسس پیدا کر دیا ہے۔

اب سب کی نظریں ریڈ کارپٹ پر مرکوز ہیں کہ کون سا ستارہ کس انداز اور لباس میں اس سال فیشن کے اس بڑے ایونٹ کا حصہ بنتا ہے۔