پریتی زنٹا کا منفرد جشن، ویڈیو سوشل میڈیا پر وائرل

آئی پی ایل 2026 کے ایک سنسنی خیز مقابلے میں پنجاب کنگز نے دہلی کیپیٹلز کے خلاف تاریخ ساز فتح حاصل کر لی۔ پنجاب نے 265 رنز کا بڑا ہدف کامیابی سے حاصل کرتے ہوئے لیگ کی تاریخ کا سب سے بڑا کامیاب رن چیز اپنے نام کر لیا۔
میچ کے بعد ٹیم کی شریک مالکہ اور بالی ووڈ اداکارہ پریتی زنٹا کی ایک ویڈیو سوشل میڈیا پر تیزی سے وائرل ہو گئی۔ ویڈیو میں وہ جیت کی خوشی میں کھلاڑیوں سے ملتی اور اپنے جذبات کا اظہار کرتی دکھائی دیں۔
میدان میں کھلاڑیوں کو مبارکباد دیتے ہوئے انہوں نے نوجوان بلے باز پرینش آریا کی عمدہ کارکردگی پر خوش ہو کر دوستانہ انداز میں انہیں ہلکا سا مکّا مارا، جس پر آریا نے بھی دلچسپ ردعمل دیا۔ یہ لمحہ شائقین کے لیے خاصا دلچسپ ثابت ہوا۔
اس دوران کمنٹری کرتے ہوئے سابق بھارتی کرکٹر روی شاستری نے بھی اس واقعے پر تبصرہ کرتے ہوئے کہا، “یہ واقعی ایک زبردست پنچ تھا!”
دوسری جانب دہلی کیپیٹلز کے لیے کے ایل راہول نے شاندار 152 رنز کی اننگز کھیلی، جو آئی پی ایل میں کسی بھی بھارتی بلے باز کا بڑا انفرادی اسکور ہے، تاہم ان کی یہ کوشش ٹیم کو شکست سے نہ بچا سکی۔
پنجاب کنگز نے بھرپور کم بیک کرتے ہوئے میچ کا رخ تبدیل کیا اور ایک یادگار کامیابی حاصل کی، جس کے بعد ٹیم اور پریتی زنٹا کا انداز سوشل میڈیا پر بھرپور توجہ حاصل کر رہا ہے۔