عباس عراقچی کی عاصم منیر سے اہم ملاقات، علاقائی صورتحال پر گفتگو

ایران کے وزیر خارجہ عباس عراقچی نے اپنے حالیہ دورۂ پاکستان کے دوران آرمی چیف فیلڈ مارشل عاصم منیر سے اہم ملاقات کی، جس میں دوطرفہ تعلقات اور خطے کی مجموعی صورتحال پر تفصیلی گفتگو کی گئی۔
سفارتی ذرائع کے مطابق اس ملاقات میں پاکستان کے وزیر داخلہ محسن نقوی، مشیر قومی سلامتی جنرل عاصم ملک اور دیگر اعلیٰ حکام بھی شریک تھے، جبکہ ایرانی وفد میں سینئر سفارتی عہدیداران شامل تھے۔
دورۂ پاکستان کے دوران عباس عراقچی کی وزیراعظم شہباز شریف سے ملاقات بھی متوقع ہے، جس میں باہمی تعاون، علاقائی امن اور سفارتی روابط کے فروغ پر بات چیت کی جائے گی۔
ایرانی حکام نے واضح کیا ہے کہ اس دورے کا مقصد پاکستان کے ساتھ تعلقات کو مزید مضبوط بنانا اور خطے میں جاری سفارتی کوششوں پر مشاورت کرنا ہے۔ انہوں نے ایران اور امریکا کے درمیان کسی براہِ راست مذاکرات کی خبروں کی تردید کی ہے۔
دوسری جانب وائٹ ہاؤس نے بھی ایک امریکی وفد کی پاکستان آمد کی تصدیق کی ہے، جس کا مقصد علاقائی صورتحال پر تبادلہ خیال بتایا جا رہا ہے۔
تجزیہ کاروں کے مطابق موجودہ صورتحال میں پاکستان ایک اہم سفارتی کردار ادا کر رہا ہے اور ممکنہ طور پر ایران اور امریکا کے درمیان کشیدگی کم کرنے میں سہولت کار بن سکتا ہے، تاہم باہمی اعتماد کی کمی اس عمل کو پیچیدہ بنا سکتی ہے۔