کم میچز میں بڑا کارنامہ، میسی نے رونالڈو کا ریکارڈ مزید چیلنج کر دیا

عالمی فٹبال کے افق پر ایک اور اہم سنگِ میل اس وقت سامنے آیا جب لیونل میسی نے اپنے کیریئر میں 900 گول مکمل کر کے تاریخ میں اپنا نام مزید مضبوط کر لیا۔
ارجنٹائن کے اسٹار کھلاڑی میسی اس اعزاز تک پہنچنے والے دنیا کے دوسرے فٹبالر بن گئے ہیں، اس سے پہلے یہ کارنامہ پرتگال کے کرسٹیانو رونالڈو انجام دے چکے ہیں۔
اعداد و شمار کے مطابق میسی نے یہ ہدف نسبتاً کم میچز میں حاصل کیا ہے۔ انہوں نے تقریباً 1142 مقابلوں میں 900 گول مکمل کیے، جبکہ رونالڈو نے یہ سنگِ میل 1236 میچز کے بعد حاصل کیا تھا، جس سے دونوں کھلاڑیوں کے درمیان کارکردگی کا موازنہ ایک بار پھر زیرِ بحث آ گیا ہے۔
میسی نے اپنا 900واں گول کلب سطح کے ایک اہم میچ میں اسکور کیا، جس میں ان کی ٹیم نے شاندار کھیل کا مظاہرہ کیا۔ اس کامیابی کے ساتھ ان کے کیریئر میں گولز کے ساتھ ساتھ اسسٹ کی تعداد بھی نمایاں ہے، جو 400 سے تجاوز کر چکی ہے، جبکہ رونالڈو کے اسسٹ بھی دو سو پچاس سے زائد بتائے جاتے ہیں۔
یہ نئی کامیابی میسی کے شاندار فٹبال کیریئر میں ایک اور اضافہ ہے اور انہیں دنیا کے عظیم ترین اسکوررز کی فہرست میں مزید مستحکم کرتی ہے۔ دوسری جانب کرسٹیانو رونالڈو بھی اپنی کارکردگی جاری رکھتے ہوئے مزید ریکارڈز بنانے کے لیے سرگرم ہیں۔