جیل میں قید پی ٹی آئی رہنماؤں کی رمضان میں احتجاج مؤخر کرنے کی اپیل

لاہور: کوٹ لکھپت جیل میں قید سینئر پی ٹی آئی رہنماؤں نے رمضان کے دوران احتجاجات مؤخر کرنے کی درخواست کی ہے۔
میڈیا کو جاری کردہ ایک مشترکہ بیان میں شاہ محمود قریشی، یاسمین راشد، اعجاز چوہدری، عمر سرفراز چیمہ اور محمود الرشید نے اپیل کی کہ رمضان المبارک میں کسی بھی قسم کی احتجاجی سرگرمی مؤخر کی جائے۔
بیان میں صدر آصف زرداری کے حالیہ بیانات کی شدید مذمت کی گئی اور کہا گیا کہ بانی پی ٹی آئی مشکل حالات میں باوقار طریقے سے قید میں وقت گزار رہے ہیں۔
قیدی رہنماؤں نے حکومت سے مطالبہ کیا کہ عمران خان کی صحت پر سیاست نہ کی جائے اور ان کے اہل خانہ اور ذاتی ڈاکٹروں کو اعتماد میں لے کر علاج معالجہ فراہم کیا جائے۔
اسی کے ساتھ انہوں نے تحریک تحفظ آئین پاکستان سے کہا کہ پارلیمان میں بھرپور سیاسی سرگرمی جاری رکھے، اور پی ٹی آئی کی تنظیم کو ازسرِنو منظم کیا جائے تاکہ بلدیاتی انتخابات کے لیے تنظیم کو نچلی سطح تک فعال بنایا جا سکے۔
بیان میں مزید کہا گیا کہ بڑھتی ہوئی دہشت گردی، مہنگائی، اسکولوں سے بچوں کی غیر حاضری اور بدعنوانی جیسے مسائل پر ہر سطح پر توجہ دی جائے۔