شیخ زاید فیسٹیول میں 6,500 ڈرونز کے ساتھ منفرد نیو ایئر شو

ابوظہبی کے علاقے الوَثبہ میں نئے سال کا استقبال شاندار انداز میں کرنے کی تیاریاں تیز ہو گئی ہیں۔ شیخ زاید فیسٹیول اس بار مشرقِ وسطیٰ کے سب سے بڑے اور جدید نیو ایئر ایونٹس میں سے ایک پیش کرنے جا رہا ہے، جہاں رنگ، روشنی، موسیقی، ثقافت اور جدید ٹیکنالوجی ایک ہی پلیٹ فارم پر نظر آئیں گے۔

فیسٹیول میں سالِ نو کی رات 62 منٹ طویل آتش بازی کا خصوصی شو شامل ہوگا، جو پانچ مختلف مراحل پر مشتمل ہوگا۔ انتظامیہ کا کہنا ہے کہ اس شو کے ذریعے پانچ نئے گنیز ورلڈ ریکارڈ قائم کرنے کی کوشش کی جائے گی۔ شو رات آٹھ بجے شروع ہوگا اور جدید ٹیکنالوجی کی مدد سے دور دور تک دیکھنے والوں کے لیے ایک دلکش منظر پیش کرے گا۔

اس بار فیسٹیول کی سب سے بڑی توجہ 6,500 ڈرونز پر مشتمل 20 منٹ کا دیوقامت شو ہے، جو اپنی نوعیت کا منفرد تجربہ قرار دیا جا رہا ہے۔ ڈرونز آسمان پر نو بڑے آرٹ سین تخلیق کریں گے جنہیں ڈیجیٹل کاؤنٹ ڈاؤن اور آتش بازی کے ساتھ ہم آہنگ کیا جائے گا، یوں نیا سال خوش آمدید کہنے کے لیے ایک شاندار منظر نامہ تشکیل پائے گا۔

تقریب میں سرکاری و نجی ادارے، عالمی پویلین اور مختلف اسٹریٹجک پارٹنرز بھرپور حصہ لے رہے ہیں۔ اماراتی ورثے کے روایتی رقص جیسے ”العَیالہ“، ”الرَّزفہ“ اور ”النَّدبہ“ سینکڑوں فنکاروں کی شاندار پیشکش کے ساتھ اسٹیجوں کی رونق بڑھائیں گے، جب کہ بین الاقوامی گروپس بھی اپنی ثقافتی جھلکیاں پیش کریں گے۔

بچوں کے لیے خصوصی پروگرام، تھیٹر شوز اور دسمبر 2025 میں کھلنے والا نیا ایمیوزمنٹ پارک بھی فیسٹیول کی سرگرمیوں کا حصہ ہوں گے، جس سے خاندانی تفریح میں مزید اضافہ ہوگا۔

انتظامیہ کی جانب سے متوقع بڑی تعداد میں آنے والے مہمانوں کے لیے سیکیورٹی اور آپریشنل اقدامات میں نمایاں بہتری لائی گئی ہے۔ داخلی و خارجی راستوں کا اضافہ، پیدل چلنے والے ٹریکس کی توسیع، تربیت یافتہ عملے کی تعیناتی اور حفاظتی و طبی سہولیات میں اضافہ کیا گیا ہے۔

فیسٹیول انتظامیہ کا کہنا ہے کہ مختص جگہیں بھرنے کے بعد گیٹس بند کر دیے جائیں گے، اس لیے وزیٹرز کو بروقت ٹکٹ بک کرنے اور سرکاری ذرائع سے اپ ڈیٹس دیکھنے کی ہدایت کی گئی ہے تاکہ کسی قسم کی پریشانی سے بچا جا سکے۔

شیخ زاید فیسٹیول کی تیاریاں اس بات کا ثبوت ہیں کہ جدید ٹیکنالوجی اور روایتی اماراتی ورثے کو ایک ساتھ ملا کر سالِ نو 2026 کو خطے کا سب سے یادگار جشن بنایا جائے گا، جہاں دنیا بھر سے آنے والے لوگ ایک منفرد ماحول میں نیا سال خوش آمدید کہیں گے۔