حج کے دوران پاکستانی عازمینِ حج کو طبی سہولیات فراہم کرنے کے لیے وزارتِ مذہبی امور نے میڈیکل مشن کی تشکیل کا فیصلہ کرتے ہوئے ڈاکٹرز اور پیرامیڈیکل اسٹاف کی بھرتی کا آغاز کر دیا ہے۔ وزارت کے مطابق بھرتی کا عمل نیشنل ٹیسٹنگ سروس کے ذریعے کیا جائے گا اور درخواستیں جمع کرانے کی آخری تاریخ کل مقرر ہے۔
جاری کردہ تفصیلات کے مطابق حج مشن کے لیے مجموعی طور پر 98 ڈاکٹرز، فارماسسٹس اور 196 پیرامیڈیکل اسٹاف سعودی عرب روانہ کیے جائیں گے۔ امیدواروں کی عمر 25 سے 55 سال کے درمیان ہونی چاہیے جبکہ کم از کم تین سال کا سرکاری تجربہ اور سروس میں حاضر ہونا بھی لازمی قرار دیا گیا ہے۔
امیدواروں کے لیے اپنے متعلقہ ڈسٹرکٹ ہیڈ کوارٹر ہسپتال سے میڈیکل فٹنس سرٹیفکیٹ جمع کرانا ضروری ہوگا۔ اعلامیے میں واضح کیا گیا ہے کہ دل، شوگر یا ہائی بلڈ پریشر کے مریض بھرتی کے اہل نہیں ہوں گے۔ وزارت نے یہ بھی بتایا ہے کہ بھرتی میں خواتین میڈیکل اسٹاف کے لیے 30 فیصد کوٹہ مختص کیا گیا ہے۔
منتخب ہونے والے افراد حج کے دوران سعودی عرب میں خدمات انجام دیں گے، جبکہ سعودی قوانین کی خلاف ورزی پر فوری وطن واپسی کی کارروائی کی جائے گی۔ وزارت کا کہنا ہے کہ میڈیکل مشن کی تعیناتی وفاقی حکومت کی ہدایات کے مطابق عمل میں لائی جائے گی۔
Leave a reply
ہاٹ لائن نیوز پر شائع ہونے والی تمام خبریں، رپورٹس، تصاویر اور وڈیوز ہماری رپورٹنگ ٹیم اور مانیٹرنگ ذرائع سے حاصل کی گئی ہیں۔ ان کو پبلش کرنے سے پہلے اسکے مصدقہ ذرائع کا ہرممکن خیال رکھا گیا ہے، تاہم کسی بھی خبر یا رپورٹ میں ٹائپنگ کی غلطی یا غیرارادی طور پر شائع ہونے والی غلطی کی فوری اصلاح کرکے اسکی تردید یا درستگی فوری طور پر ویب سائٹ پر شائع کردی جاتی ہے۔