انار کے پتے: قدرتی ہیلتھ بوسٹر جو دل، جلد اور معدے کی بہترین حفاظت کریں

ماہرینِ طب کے مطابق انار کے پتے قدرت کا ایسا تحفہ ہیں جو دل سے لے کر جلد تک جسم کے ہر حصے کے لیے فائدہ مند ثابت ہوتے ہیں۔ ان پتوں میں موجود قدرتی اجزا جسم کی قوتِ مدافعت بڑھاتے اور کئی امراض سے بچاؤ میں مدد دیتے ہیں۔

انار کے پتے صدیوں سے روایتی علاج میں استعمال کیے جا رہے ہیں۔ ماہرین کا کہنا ہے کہ ان پتوں کی چائے یا قہوہ خون میں شوگر کی سطح متوازن رکھنے، خراب کولیسٹرول کم کرنے اور دل کی شریانوں کو صحت مند رکھنے میں معاون ہے۔

انار کے پتوں میں موجود اینٹی آکسیڈنٹس اور فلیوونائیڈز بڑھتی عمر کے اثرات کو کم کرتے ہیں جبکہ جلد کو قدرتی طور پر تروتازہ رکھتے ہیں۔ ان کا قہوہ بدہضمی، گیس اور قبض جیسے مسائل کے لیے بھی مفید سمجھا جاتا ہے۔

طبّی ماہرین کے مطابق ان پتوں میں اینٹی بیکٹیریل اور اینٹی وائرل خصوصیات بھی پائی جاتی ہیں جو موسمی انفیکشنز، نزلہ اور کھانسی سے بچاؤ فراہم کرتی ہیں۔ جلدی مسائل کے لیے ان پتوں کا پیسٹ یا تیل استعمال کیا جا سکتا ہے، جو دانوں اور بالوں کے گرنے کے مسئلے کو کم کرنے میں مدد دیتا ہے۔

انار کے پتے جوڑوں کے درد اور سوجن میں بھی آرام پہنچاتے ہیں۔ ان کا قہوہ پینے یا لیپ لگانے سے جسمانی تھکن اور اکڑاہٹ میں قدرتی سکون ملتا ہے۔

استعمال کا آسان طریقہ:
چند تازہ پتے ایک کپ پانی میں ابال کر صبح نہار منہ یا رات سونے سے پہلے پئیں۔ خشک پتوں کو پیس کر سفوف بنا کر بھی استعمال کیا جا سکتا ہے۔

احتیاط:
اگر آپ ذیابیطس، بلڈ پریشر یا دل کی کسی دوا کا استعمال کر رہے ہیں، تو انار کے پتوں کا قہوہ پینے سے پہلے ڈاکٹر سے مشورہ ضرور کریں۔