اسرائیل کاامریکی صدر ڈونلڈ ٹرمپ کو اعلیٰ ترین شہری اعزاز دینے کا اعلان

یروشلم – اسرائیل نے سابق امریکی صدر ڈونلڈ ٹرمپ کو ملک کا اعلیٰ ترین شہری اعزاز “اسرائیلی صدارتی میڈل آف آنر” دینے کا اعلان کیا ہے۔ اسرائیلی صدر آئزک ہرزوگ کے مطابق، یہ اعزاز مشرق وسطیٰ میں قیام امن، یرغمالیوں کی رہائی، اور خطے میں نئے دور کی بنیاد رکھنے میں ٹرمپ کے کردار کے اعتراف کے طور پر دیا جا رہا ہے۔

صدر ٹرمپ ایک مختصر دورے پر اسرائیل پہنچے ہیں، جہاں بن گورین ایئرپورٹ پر ان کا استقبال اسرائیلی صدر ہرزوگ اور وزیراعظم بنیامین نیتن یاہو نے کیا۔ ان کے ہمراہ داماد جیرڈ کشنر، بیٹی ایوانکا ٹرمپ، اور مشرق وسطیٰ کے لیے امریکہ کے خصوصی نمائندے اسٹیو وٹکوف بھی موجود تھے۔

اسرائیلی صدر کے دفتر سے جاری بیان میں کہا گیا ہے کہ ٹرمپ نے غزہ سے یرغمالیوں کی واپسی، جنگ بندی کے قیام اور علاقائی استحکام کے لیے کلیدی کردار ادا کیا۔ بیان میں مزید کہا گیا کہ ٹرمپ کی کوششوں سے مشرق وسطیٰ میں تعاون اور پائیدار امن کی نئی راہیں کھلی ہیں۔

یہ اعزاز آئندہ چند ماہ میں ایک خصوصی تقریب میں باضابطہ طور پر پیش کیا جائے گا، تاہم صدر ٹرمپ کو ان کے دورے کے دوران اس فیصلے سے آگاہ کر دیا گیا ہے۔

صدر ٹرمپ اپنے دورے کے دوران اسرائیلی پارلیمنٹ “کنیسٹ” سے خطاب کریں گے اور یرغمالیوں کے اہل خانہ سے ملاقات بھی کریں گے۔ ان کا یہ دورہ غزہ میں دو سال سے جاری تنازعے کے بعد ایک اہم سنگِ میل سمجھا جا رہا ہے۔

ذرائع کے مطابق، ٹرمپ کے پیش کردہ 20 نکاتی امن منصوبے کو اسرائیل اور حماس دونوں نے منظور کیا ہے، جس کے تحت جنگ بندی، اسرائیلی فوج کی مرحلہ وار واپسی، قیدیوں کے تبادلے اور غزہ میں خودمختار انتظامی نظام کے قیام کا خاکہ شامل ہے۔

معاہدے کے تحت قیدیوں اور یرغمالیوں کے تبادلے کا پہلا مرحلہ آج مکمل ہونے جا رہا ہے۔