ہوم ورک میں مصنوعی ذہانت کااستعمال

ہاٹ لائن نیوز : ایک نئی تحقیق سے پتا چلا ہے کہ 50 فیصد سے زائد نوجوانوں نے گزشتہ سال ای میل، اسکول کے کام یا ملازمت کے کام کے لیے مصنوعی ذہانت والی چیٹ بوٹ کا استعمال کیا ہے۔

برطانوی کمپنی نومینیٹ نے آٹھ سے 25 سال کی عمر کے 4000 افراد کا سروے کیا۔ان میں سے 54 فیصد افراد نے مستقبل میں ملازمتوں پر مصنوعی ذہانت کے متوقع اثرات پر تشویش کا اظہار کیا۔

ڈیٹا کو کمپنی نے نئے ڈیجیٹل یوتھ انڈیکس میں پیش کیا ہے۔ یہ انڈیکس نوجوانوں کے آن لائن رویوں اور عادات کا جائزہ لیتا ہے۔

نومینیٹ کے سی ای او پال فلیچر نے کہا کہ نوجوانوں کو اے آئی ٹیکنالوجی کو اپناتے ہوئے دیکھنا حوصلہ افزا ہے۔

سروے میں شامل 94 فیصد نے کہا کہ وہ آن لائن خود کو محفوظ محسوس کرتے ہیں۔ تاہم، 76 فیصد نے کہا کہ انہیں انٹرنیٹ پر ناخوشگوار مواد کا سامنا کرنا پڑا ہے۔

یہ شرح گزشتہ سال کے مقابلے سات فیصد زیادہ ہے۔ اس کے علاوہ نفرت انگیز مواد اور گمراہ کن خبروں میں چار فیصد جبکہ نامناسب مواد میں چھ فیصد اضافہ ہوا۔

پال فلیچر نے کہا کہ جارحانہ مواد میں اضافے نے نوجوانوں کے لیے آن لائن نقصان سے نمٹنے کی اہمیت کو اجاگر کیا۔