اسد عمر نے پی ٹی آئی کیوں چھوڑی ؟اہم وجہ سامنے آگئی 

ہاٹ لائن نیوز: پاکستان تحریک انصاف (پی ٹی آئی) کے رہنما اسد عمر نے اعلان کیا ہے کہ وہ ’سیاست مکمل طور پر چھوڑ رہے ہیں‘ اور پارٹی کی بنیادی رکنیت سے بھی مستعفی ہو رہے ہیں۔

ہفتہ کو ایکس (ٹوئٹر) پر جاری بیان میں اسد عمر نے کہا کہ ایک دہائی سے زیادہ عوامی زندگی میں گزارنے کے بعد میں نے سیاست کو مکمل طور پر چھوڑنے کا فیصلہ کیا ہے۔

ان کا مزید کہنا تھا کہ ‘میں ریاستی اداروں سے ٹکراؤ کی پالیسی سے واقف نہیں ہوں اور ایسی پالیسی ریاستی اداروں کے ساتھ ٹکراؤ کا باعث بنی ہے جو ملک کے مفاد میں نہیں ہے۔’

خیال رہے کہ 9 مئی کے پرتشدد مظاہروں کے بعد اسد عمر نے 24 مئی کو پی ٹی آئی کے جنرل سیکریٹری اور کور کمیٹی کے رکن کے عہدے سے استعفیٰ دے دیا تھا۔

اس وقت ہونے والی پریس کانفرنس میں اسد عمر نے 9 مئی کے واقعات کی مذمت کرتے ہوئے کہا کہ اس دن دیکھنے والے مناظر نہ صرف قابل مذمت ہیں بلکہ لمحہ فکریہ ہیں۔

انہوں نے کہا تھا کہ 9 مئی کے واقعات کی شفاف تحقیقات ہونی چاہیے، ذمہ داروں کے خلاف کارروائی ہونی چاہیے اور گرفتار ہونے والے ہزاروں بے گناہوں کو رہا کیا جانا چاہیے۔