پلاسٹک کی بالٹیوں اور لانڈری ٹب کا پیلا پن دور کرنے کے آسان گھریلو طریقے

گھروں میں روزانہ استعمال ہونے والی پلاسٹک کی بالٹیاں اور لانڈری ٹب وقت گزرنے کے ساتھ اپنی اصل چمک کھو دیتے ہیں۔ خصوصاً سخت یا نمکیات والے پانی کے استعمال سے ان پر سفید اور پیلے دھبے بن جاتے ہیں، جنہیں عام صابن سے صاف کرنا مشکل ہوتا ہے۔

ماہرین کے مطابق پانی میں موجود کیلشیم اور میگنیشیم جیسے معدنیات سطح پر جمع ہو کر سخت تہہ بنا دیتے ہیں۔ تاہم چند آسان گھریلو طریقوں سے ان داغوں کو کم کیا جا سکتا ہے۔

سرکہ اور بیکنگ سوڈا: دو چائے کے چمچ بیکنگ سوڈا میں سفید سرکہ ملا کر پیسٹ بنائیں۔ اسے داغوں پر لگائیں اور 15 سے 20 منٹ بعد نرم اسفنج سے صاف کرکے پانی سے دھو لیں۔

لیموں کا استعمال: لیموں میں موجود قدرتی تیزابیت معدنی داغوں کو نرم کرنے میں مدد دیتی ہے۔ لیموں کا رس داغوں پر لگائیں اور تقریباً 10 منٹ بعد دھو لیں۔

سائٹرک ایسڈ: پرانے داغوں کے لیے نیم گرم پانی میں دو سے تین چائے کے چمچ سائٹرک ایسڈ حل کرکے 30 منٹ تک چھوڑ دیں۔ بعد ازاں نرم اسفنج سے صفائی کریں۔

ماہرین کا مشورہ ہے کہ صفائی کے بعد بالٹی کو خشک رکھا جائے اور اس میں پانی جمع نہ ہونے دیا جائے۔ سرکہ اور سائٹرک ایسڈ کو کبھی بلیچ یا دیگر کیمیکلز کے ساتھ نہ ملائیں۔