پیٹرول کی قیمت میں کمی، ڈیزل مزید مہنگا ہوگیا

اسلام آباد: حکومت نے پیٹرولیم مصنوعات کی قیمتوں میں تبدیلی کرتے ہوئے پیٹرول فی لیٹر 3 روپے 63 پیسے سستا کردیا، جبکہ ہائی اسپیڈ ڈیزل کی قیمت میں 31 پیسے کا اضافہ کیا گیا ہے۔

پیٹرولیم ڈویژن کے جاری کردہ نوٹیفکیشن کے مطابق 16 اکتوبر کے لیے پیٹرول اور ڈیزل کی نئی قیمتوں کا اعلان کیا گیا ہے۔ قیمتوں میں ردوبدل اوگرا کی جانب سے حکومتی طریقہ کار کے تحت کی گئی سفارشات کی بنیاد پر کیا گیا۔

جاری کردہ تفصیلات کے مطابق پیٹرول کی فی لیٹر قیمت 393 روپے 86 پیسے سے کم ہوکر 390 روپے 23 پیسے ہوگئی ہے۔

اس کے برعکس ہائی اسپیڈ ڈیزل کی قیمت میں اضافہ کیا گیا ہے، جس کے بعد اس کی نئی قیمت 396 روپے 96 پیسے فی لیٹر مقرر کردی گئی ہے۔ اس سے قبل ڈیزل 396 روپے 65 پیسے فی لیٹر فروخت ہورہا تھا۔

حالیہ فیصلے کے نتیجے میں پیٹرول استعمال کرنے والوں کو فی لیٹر کچھ ریلیف ملے گا، جبکہ ڈیزل کی قیمت میں معمولی اضافے کا سامنا کرنا پڑے گا۔