میسی کا ارجنٹینا کو جذباتی الوداع، آخری میچ میں گول بھی داغ دیا

بیونس آئرس: ارجنٹینا کے لیجنڈ فٹبالر اور کپتان لیونل میسی نے قومی ٹیم کے ساتھ اپنے طویل بین الاقوامی سفر کا جذباتی انداز میں اختتام کردیا۔ مونومینٹل اسٹیڈیم میں ہزاروں شائقین نے اپنے محبوب کھلاڑی کو آخری مرتبہ ارجنٹینا کی جرسی میں ایکشن میں دیکھا۔

میسی کے آخری میچ میں ارجنٹینا نے بینن کو 3-0 سے شکست دی۔ تقریباً 85 ہزار تماشائیوں کی موجودگی میں کھیلے گئے اس میچ میں میسی نے پنالٹی پر گول کیا، جبکہ انہوں نے ابتدائی گول میں نکولس اوٹامینڈی کی مدد بھی کی۔ نیکو پاز نے بھی ارجنٹینا کی جانب سے ایک گول اسکور کیا۔

میچ سے قبل ہی اسٹیڈیم کے باہر شائقین کی بڑی تعداد میسی کو خراج تحسین پیش کرنے کے لیے جمع تھی۔ ٹیم بس کے راستے میں موجود مداحوں کا جوش دیکھ کر میسی بھی جذباتی ہوگئے۔

میسی اپنے بچوں کے ہمراہ میدان میں داخل ہوئے، جبکہ ان کی اہلیہ انٹونیلا روکوزو اور والدہ سیلیا بھی اس موقع پر موجود تھیں۔ گراؤنڈ میں میسی کے مشہور نمبر 10 والی ایک بڑی جرسی رکھی گئی جس پر ’’Gracias‘‘ یعنی ’’شکریہ‘‘ تحریر تھا۔

ارجنٹینا کے قومی ترانے کے دوران بھی میسی اپنے جذبات پر قابو نہ رکھ سکے۔ انہیں خراج تحسین پیش کرنے کے لیے میچ کے دسویں منٹ میں کھیل روکا گیا اور شائقین نے کھڑے ہو کر ایک منٹ تک تالیاں بجا کر اپنے کپتان کو الوداع کہا۔

میسی نے میچ کے 71ویں منٹ میں پنالٹی کو گول میں تبدیل کرکے اپنی آخری بین الاقوامی پیشی کو یادگار بنا دیا۔ میچ کے اختتام پر خصوصی ڈرون شو بھی پیش کیا گیا، جس میں آسمان پر میسی کے کیریئر کی جھلکیاں دکھائی گئیں۔

ارجنٹینا کے لیے میسی کا سفر کامیابیوں سے بھرپور رہا۔ 2022 کے ورلڈ کپ میں انہوں نے ٹیم کو 36 سال بعد عالمی چیمپئن بننے میں اہم کردار ادا کیا۔ اس کے علاوہ وہ ارجنٹینا کے ساتھ دو مرتبہ کوپا امریکا بھی جیت چکے ہیں۔

میسی کے سابق ساتھی نیمار نے بھی انہیں خراج تحسین پیش کرتے ہوئے کہا کہ ان کی خدمات صرف ارجنٹینا تک محدود نہیں بلکہ دنیا بھر کے فٹبال شائقین ان کے شکر گزار ہیں۔

ارجنٹینا کے کھلاڑی روڈریگو ڈی پال نے بھی میسی کو خراج تحسین پیش کیا۔ ان کا کہنا تھا کہ میسی نے انہیں صرف ایک بہتر فٹبالر ہی نہیں بلکہ ایک بہتر انسان، والد اور دوست بننے میں بھی متاثر کیا۔

میسی کے مستقبل کے حوالے سے بھی قیاس آرائیاں جاری ہیں۔ ان کا انٹر میامی کے ساتھ معاہدہ 2028 تک ہے، تاہم وہ پہلے ہی عندیہ دے چکے ہیں کہ فٹبال سے مکمل ریٹائرمنٹ کا فیصلہ ان کی موجودہ توقعات سے پہلے بھی ہوسکتا ہے۔