تیسرے ٹیسٹ سے قبل پاکستانی کرکٹرز کے موبائل فون جمع کیے جانے کی اطلاعات

برمنگھم: انگلینڈ کے خلاف تیسرے اور آخری ٹیسٹ سے قبل پاکستان کرکٹ ٹیم کے حوالے سے ایک غیر معمولی پیش رفت سامنے آئی ہے، جہاں اطلاعات کے مطابق قومی ٹیم کے کھلاڑیوں اور اسٹاف کے موبائل فون پاکستان کرکٹ بورڈ (پی سی بی) نے اپنی تحویل میں لے لیے ہیں۔

بھارتی میڈیا کی ایک رپورٹ میں دعویٰ کیا گیا ہے کہ موبائل فون ایجبسٹن میں شیڈول تیسرے ٹیسٹ کے اختتام تک بورڈ کے پاس رہیں گے۔ تاہم یہ واضح نہیں کہ ٹیم کے تمام کھلاڑیوں اور ارکان کے فون جمع کیے گئے ہیں یا یہ اقدام مخصوص افراد تک محدود ہے۔

پی سی بی کی جانب سے تاحال اس حوالے سے کوئی باضابطہ وضاحت سامنے نہیں آئی، اس لیے موبائل فون جمع کرنے کی حتمی وجہ بھی واضح نہیں ہو سکی۔

یہ پیش رفت ایسے وقت میں سامنے آئی ہے جب انگلینڈ کے خلاف آخری ٹیسٹ سے قبل پاکستانی ٹیم میں انتظامی اور کوچنگ سطح پر متعدد تبدیلیاں کی گئی ہیں۔ ٹیم میں ہونے والی حالیہ تبدیلیوں کے باعث بھی قومی اسکواڈ خاصی توجہ حاصل کر رہا ہے۔

واضح رہے کہ بین الاقوامی کرکٹ میں کھلاڑیوں اور ٹیم آفیشلز کے موبائل فون کے استعمال سے متعلق پہلے ہی پابندیاں موجود ہیں۔ آئی سی سی کے ضوابط کے تحت میچ کے دوران مخصوص محدود مقامات، بشمول ڈریسنگ روم، میں مواصلاتی آلات کے استعمال پر پابندی عائد ہے۔

تاہم پوری ٹیم کے موبائل فون ٹیسٹ کے اختتام تک تحویل میں رکھے جانے کی اطلاعات معمول کی میچ ڈے پابندیوں سے مختلف نوعیت کا اقدام معلوم ہوتی ہیں۔

پی سی بی کی جانب سے باضابطہ موقف سامنے آنے کے بعد ہی یہ واضح ہو سکے گا کہ فون جمع کرنے کا فیصلہ کیوں کیا گیا اور اس کا اطلاق کن افراد پر ہوا ہے۔

پاکستان اور انگلینڈ کے درمیان سیریز کا تیسرا اور آخری ٹیسٹ ایجبسٹن میں کھیلا جانا ہے، جس پر شائقین کی نظریں پہلے ہی مرکوز ہیں۔