انسٹاگرام اور فیس بک پر نوجوان صارفین کے لیے سخت حفاظتی اقدامات کا اعلان

ٹیکنالوجی: میٹا نے 18 سال سے کم عمر صارفین کے لیے انسٹاگرام اور فیس بک کے استعمال کو مزید محفوظ بنانے کے لیے متعدد نئی پابندیاں اور حفاظتی فیچرز متعارف کرانے کا منصوبہ بنایا ہے۔

نئے اقدامات کے تحت نوعمر صارفین کے روزانہ سوشل میڈیا استعمال کا دورانیہ محدود کیا جائے گا، جبکہ رات کے اوقات میں دونوں پلیٹ فارمز تک رسائی بھی روکنے کی تجویز ہے۔ والدین کو مخصوص حالات میں اپنے بچوں کے لیے اضافی اسکرین ٹائم کی اجازت دینے کا اختیار حاصل ہوگا۔

منصوبے کے مطابق نوجوانوں کے اکاؤنٹس پر رات 12 بجے سے صبح 6 بجے تک انسٹاگرام اور فیس بک کا استعمال خودکار طور پر بند رہے گا۔ اسی طرح اسکول کے اوقات میں غیر ضروری توجہ بٹنے سے بچانے کے لیے صبح 8 بجے سے سہ پہر 3 بجے تک نوٹیفکیشنز خاموش رکھنے کا نظام بھی متعارف کرایا جائے گا۔

میٹا مسلسل سوشل میڈیا استعمال کرنے والے نوجوانوں کو وقفہ لینے کی یاد دہانی بھی کرائے گی۔ یہ یاد دہانیاں استعمال کے مختلف دورانیوں کے بعد ظاہر ہوں گی تاکہ صارف طویل وقت تک مسلسل اسکرولنگ سے گریز کرے۔

نوجوانوں کو ویڈیوز کے آٹو پلے کو بند کرنے کا اختیار بھی دیا جائے گا۔ اس کے علاوہ وہ اپنی سرگرمیوں کی بنیاد پر تیار ہونے والی ذاتی نوعیت کی فیڈ کو غیر فعال کرکے نسبتاً غیر شخصی انداز میں مواد دیکھ سکیں گے۔

کمپنی نوعمر صارفین کے لیے لائکس کی تعداد چھپانے اور ایسے فلٹرز و ایفیکٹس محدود کرنے پر بھی کام کر رہی ہے جو ظاہری شکل میں انتہائی تبدیلی یا کاسمیٹک سرجری جیسا تاثر پیدا کرتے ہیں۔

اجنبی بالغ افراد سے رابطے پر مزید پابندیاں

نئے حفاظتی نظام میں اجنبی بالغ افراد اور نوعمر صارفین کے درمیان رابطے کو محدود کرنا بھی شامل ہے۔ میٹا ایسے فیچرز کو مزید مضبوط کرے گی جن کے ذریعے بالغ افراد کے لیے نوجوان صارفین کو براہ راست پیغامات بھیجنا یا ان کا مواد دیکھنا مشکل بنایا جا سکے۔

نوجوانوں کو نقصان دہ یا نامناسب مواد کی نشاندہی اور رپورٹ کرنے کے لیے بھی سہولت فراہم کی جائے گی۔ میٹا نے ایسی رپورٹس پر تیزی سے کارروائی کرنے کا ہدف مقرر کیا ہے۔

والدین کے لیے نگرانی مزید مؤثر بنانے کی تیاری

والدین کے کنٹرولز کے ذریعے والدین اپنے بچوں کے سوشل میڈیا استعمال سے متعلق مختلف معلومات دیکھ سکیں گے، جن میں پلیٹ فارم پر گزارا جانے والا وقت، تلاش کی جانے والی چیزیں اور بعض رابطے شامل ہیں۔

اگر کسی کم عمر صارف کے اکاؤنٹ پر مشکوک سرگرمی سامنے آتی ہے یا وہ کسی بالغ فرد کے ساتھ غیر معمولی رابطے میں ہو تو والدین کو اطلاع دینے کے نظام کو بھی بہتر بنایا جائے گا۔

عمر کی تصدیق پر بھی توجہ

میٹا عمر کی تصدیق کے نظام کو مزید مؤثر بنانے کے لیے ٹیکنالوجی میں سرمایہ کاری بڑھانے کا ارادہ رکھتی ہے۔ کمپنی خاص طور پر 13 سال سے کم عمر بچوں کے اکاؤنٹس کی شناخت کرکے انہیں پلیٹ فارمز سے ہٹانے کی کوشش کرے گی۔

میٹا کے مطابق ان تبدیلیوں کا مقصد نوجوانوں کو سوشل میڈیا سے مکمل طور پر دور کرنا نہیں بلکہ ان کے استعمال کے دورانیے، آن لائن رابطوں اور مواد تک رسائی کو زیادہ محفوظ اور قابو میں رکھنا ہے۔

زیادہ تر نئے اقدامات آئندہ چند ماہ میں نافذ کیے جانے کی توقع ہے، جبکہ عمر کی تصدیق سے متعلق بعض تبدیلیوں کے مکمل نفاذ میں زیادہ وقت لگ سکتا ہے۔