گیٹ وِک ایئرپورٹ کے قریب آسمان میں پراسرار شے، تحقیقات بھی معمہ حل نہ کر سکیں

برطانیہ کے شہر لندن میں واقع گیٹ وِک ایئرپورٹ کے قریب ایک مسافر طیارے کے پائلٹ نے پرواز کے دوران ایک پراسرار گول نما فضائی شے دیکھنے کا دعویٰ کیا ہے، تاہم تحقیقات کے باوجود اس شے کی شناخت نہیں ہو سکی۔
برطانوی میڈیا رپورٹس کے مطابق یہ واقعہ اس وقت پیش آیا جب ایک ایئربس A319 طیارہ گیٹ وِک ایئرپورٹ پر لینڈنگ کی تیاری کر رہا تھا۔ پائلٹ کے مطابق بلندی کم کرتے ہوئے اس نے طیارے کے دائیں جانب ایک گول اور چپٹی شکل کی شے دیکھی، جو مخالف سمت میں تقریباً اسی بلندی پر پرواز کر رہی تھی اور اندازاً 100 فٹ کے فاصلے سے گزری۔
اس واقعے کی تحقیقات برطانیہ کے یو کے ایئر پراکس بورڈ نے کیں، جو فضائی سفر کے دوران پیش آنے والے ایسے واقعات کا جائزہ لیتا ہے جن میں دو فضائی اشیا غیر معمولی طور پر ایک دوسرے کے قریب آ جائیں۔
تحقیقی رپورٹ کے مطابق یہ شے گیٹ وِک ایئرپورٹ سے تقریباً سات میل جنوب میں واقع ہینگ کراس کے علاقے کے قریب دیکھی گئی۔ پائلٹ نے بتایا کہ شے کی شکل ایک گول ڈسک جیسی تھی اور اس کے کناروں پر گہرے رنگ کے نشانات دکھائی دے رہے تھے۔ عملے نے امکان ظاہر کیا کہ یہ کوئی جدید ڈرون ہو سکتا ہے، تاہم اس کی نوعیت کی تصدیق نہیں ہو سکی۔
رپورٹ میں بتایا گیا کہ اگرچہ یہ شے طیارے کے قریب سے گزری، لیکن پرواز کے راستے میں ہنگامی تبدیلی یا اضافی حفاظتی اقدام کی ضرورت پیش نہیں آئی کیونکہ طیارہ پہلے ہی معمول کے مطابق مڑ رہا تھا۔
تحقیقات کے دوران کسی دوسرے پائلٹ نے ایسی شے دیکھنے کی اطلاع نہیں دی، البتہ فضائی ٹریفک کنٹرول نے احتیاطی تدابیر کے طور پر دیگر طیاروں کو آگاہ کر دیا تھا۔
یو کے ایئر پراکس بورڈ نے اپنی حتمی رپورٹ میں کہا کہ دستیاب شواہد اور معلومات کی بنیاد پر یہ تعین کرنا ممکن نہیں کہ پائلٹ نے دراصل کیا دیکھا تھا۔ رپورٹ کے مطابق واقعے سے پرواز کی حفاظت پر محدود اثر پڑا، تاہم کسی تصادم کا حقیقی خطرہ موجود نہیں تھا۔