کیا عمر بڑھنے کے ساتھ دانتوں کا گرنا لازمی ہے؟ ماہرین کی رائے اور اہم حفاظتی مشورے

عام طور پر یہ تصور پایا جاتا ہے کہ عمر بڑھنے کے ساتھ دانت خود بخود کمزور ہو کر گرنے لگتے ہیں، تاہم جدید دندان سازی اس خیال کی تائید نہیں کرتی۔ ماہرین کے مطابق اگر منہ اور دانتوں کی مناسب دیکھ بھال کی جائے تو انسان طویل عرصے تک اپنے قدرتی دانت برقرار رکھ سکتا ہے، حتیٰ کہ بعض صورتوں میں عمر بھر بھی۔

ڈینٹل ماہرین کا کہنا ہے کہ دانت اچانک ضائع نہیں ہوتے بلکہ یہ برسوں کی لاپرواہی کا نتیجہ ہوتا ہے۔ اس عمل کے پیچھے بنیادی طور پر دو بڑی وجوہات سامنے آتی ہیں: مسوڑھوں کی بیماریاں اور دانتوں میں کیڑا لگنا (کیویٹیز)۔

مسوڑھوں کی بیماری ابتدا میں معمولی سوزش کی صورت میں ظاہر ہوتی ہے، لیکن اگر اس کا علاج نہ کیا جائے تو یہ بتدریج دانتوں کو سہارا دینے والی ہڈی کو متاثر کر کے دانتوں کے ڈھیلے پڑنے اور گرنے کا سبب بن سکتی ہے۔ دوسری جانب میٹھے کھانوں کا زیادہ استعمال اور صفائی میں کمی دانتوں میں کیڑا پیدا کرتی ہے، جو وقت کے ساتھ دانت کی جڑ تک پہنچ کر اسے مکمل طور پر نقصان پہنچا سکتا ہے۔

ماہرین یہ بھی بتاتے ہیں کہ بڑھتی عمر کے ساتھ کچھ عوامل دانتوں کے مسائل کے خطرے کو بڑھا دیتے ہیں، جن میں منہ کا خشک رہنا شامل ہے، جو اکثر ادویات کے استعمال کی وجہ سے ہوتا ہے۔ اسی طرح ذیابیطس جیسے امراض مدافعتی نظام کو کمزور کر کے مسوڑھوں کی بیماریوں کو بڑھا سکتے ہیں۔ طویل عرصے تک سخت غذا کا استعمال بھی دانتوں کی قدرتی تہہ کو کمزور کر دیتا ہے۔

دانتوں کی حفاظت کے لیے صرف برش کرنا کافی نہیں، بلکہ درست طریقہ اپنانا ضروری ہے۔ ماہرین کے مطابق نرم برش کو 45 درجے کے زاویے پر مسوڑھوں کے ساتھ ہلکے ہاتھ سے استعمال کرنا بہتر ہے، کیونکہ سخت برش اینامل کو نقصان پہنچا سکتا ہے۔ زبان کی صفائی بھی ضروری ہے تاکہ بیکٹیریا اور بدبو پیدا نہ ہو۔

اس کے علاوہ پانی کا زیادہ استعمال منہ میں تیزابیت کم کرنے میں مدد دیتا ہے، جبکہ کیلشیم اور وٹامن سی سے بھرپور غذا مسوڑھوں اور دانتوں کو مضبوط رکھتی ہے۔

ماہرین یہ بھی زور دیتے ہیں کہ دانتوں اور مسوڑھوں کی صحت کا تعلق مجموعی جسمانی صحت، خصوصاً دل کی صحت سے بھی ہے۔ اس لیے ہر چھ ماہ بعد ڈینٹسٹ سے معائنہ کروانا نہ صرف دانتوں بلکہ پورے جسم کی صحت کے لیے فائدہ مند ہے۔

ماہرین کے مطابق اگر بروقت احتیاطی تدابیر اختیار کی جائیں تو بڑھاپا دانتوں کے ضائع ہونے کی وجہ نہیں بنتا، بلکہ اصل مسئلہ روزمرہ کی لاپرواہی ہے۔