پیٹرول پمپس کی ممکنہ ملک گیر بندش، ڈیلرز نے حکومت کو 72 گھنٹے کی مہلت دے دی

اسلام آباد: پاکستان پیٹرولیم ڈیلرز ایسوسی ایشن نے حکومت کو مطالبات تسلیم کرنے کے لیے 72 گھنٹے کا الٹی میٹم دیتے ہوئے ملک بھر میں پیٹرول پمپس بند کرنے کی دھمکی دے دی ہے۔

ایسوسی ایشن کے چیئرمین ملک خدا بخش نے منگل کو پریس کانفرنس میں اعلان کیا کہ اگر حکومت نے ڈیلرز کے مطالبات پر مقررہ مدت کے اندر فیصلہ نہ کیا تو 15 اگست کو صبح 6 بجے سے ملک بھر کے پیٹرول پمپس غیرمعینہ مدت کے لیے بند کردیے جائیں گے۔

ملک خدا بخش کے مطابق ڈیلرز اپنے مطالبات کے حوالے سے حکومت سے مسلسل رابطے میں ہیں، تاہم گزشتہ کئی روز گزرنے کے باوجود کوئی خاطر خواہ پیش رفت سامنے نہیں آئی۔

انہوں نے کہا کہ پیٹرولیم مصنوعات کی قیمتوں میں روزانہ تبدیلی کے موجودہ نظام نے ڈیلرز کے لیے کاروباری مشکلات میں اضافہ کردیا ہے۔ قیمتوں میں مسلسل اتار چڑھاؤ کے باعث اسٹاک اور مالی معاملات کو سنبھالنا مشکل ہورہا ہے۔

پاکستان پیٹرولیم ڈیلرز ایسوسی ایشن نے مطالبہ کیا ہے کہ ڈیلرز کا مارجن موجودہ سطح سے بڑھا کر 8 فیصد کیا جائے۔ ایسوسی ایشن کا مؤقف ہے کہ بڑھتے ہوئے آپریشنل اخراجات کے مقابلے میں موجودہ مارجن ناکافی ہے۔

ڈیلرز کا ایک اہم مطالبہ پیٹرولیم مصنوعات کی قیمتوں کے روزانہ تعین کے طریقہ کار پر نظرثانی بھی ہے۔ ان کے مطابق قیمتوں میں بار بار تبدیلی سے کاروباری خطرات بڑھ رہے ہیں اور ڈیلرز کو مالی نقصان کا سامنا کرنا پڑ سکتا ہے۔

واضح رہے کہ ڈیلرز کی جانب سے مارجن میں اضافے کا مطالبہ پہلے بھی سامنے آچکا ہے۔ رواں سال مارچ میں بھی ایسوسی ایشن نے 8 فیصد مارجن کے مطالبے پر ملک گیر ہڑتال کی دھمکی دی تھی، تاہم خطے کی کشیدہ صورتحال اور تیل کی سپلائی سے متعلق خدشات کے باعث ہڑتال مؤخر کردی گئی تھی۔

دوسری جانب حکومت نے جولائی میں پیٹرولیم مصنوعات کی قیمتوں کے تعین کے لیے روزانہ کی بنیاد پر نیا طریقہ کار متعارف کرایا تھا۔ حکومتی مؤقف کے مطابق اس نظام میں 7 روزہ رولنگ ایوریج کو بنیاد بنایا جائے گا تاکہ قیمتوں کے تعین میں شفافیت آئے اور مارکیٹ میں غیر ضروری اتار چڑھاؤ کو محدود کیا جاسکے۔

20 جولائی کو ڈیلرز کے ایک وفد نے حکومتی روزانہ قیمتوں کے نظام کی حمایت بھی کی تھی، تاہم اسی موقع پر مارجن میں اضافے کا مطالبہ دوبارہ سامنے رکھا گیا۔ حکومت کی جانب سے مارجن کے معاملے پر غور کی یقین دہانی کرائی گئی تھی اور اوگرا کے ساتھ مشاورت کا بھی عندیہ دیا گیا تھا۔

اب ڈیلرز ایسوسی ایشن نے ایک بار پھر سخت مؤقف اختیار کرتے ہوئے حکومت کو 72 گھنٹے کی مہلت دی ہے۔ مطالبات پر اتفاق نہ ہونے کی صورت میں 15 اگست سے پیٹرول پمپس کی غیرمعینہ مدت کی بندش کا اعلان ملک میں پیٹرولیم مصنوعات کی فراہمی کے حوالے سے نئی تشویش پیدا کرسکتا ہے۔