پاکستان کو آئی ایم ایف سے 1.3 ارب ڈالر موصول، معیشت کیلئے اہم پیشرفت

پاکستان کو عالمی مالیاتی فنڈ (آئی ایم ایف) کی جانب سے 1.3 ارب ڈالر کی رقم موصول ہوگئی ہے، جسے ملکی معیشت اور زرمبادلہ کے ذخائر کیلئے ایک اہم پیشرفت قرار دیا جا رہا ہے۔ یہ فنڈز آئی ایم ایف کے ایکسٹینڈڈ فنڈ فیسیلٹی (ای ایف ایف) اور ریزیلیئنس اینڈ سسٹین ایبلٹی فیسیلٹی (آر ایس ایف) پروگرامز کے تحت پاکستان کو فراہم کیے گئے ہیں۔

اسٹیٹ بینک آف پاکستان کے مطابق موصول ہونے والی رقم 15 مئی کو ختم ہونے والے ہفتے کے دوران ملکی زرمبادلہ ذخائر میں شامل کی جائے گی۔ حکام کا کہنا ہے کہ اس اقدام سے بیرونی ادائیگیوں کے دباؤ میں کمی آئے گی اور مالیاتی استحکام کو تقویت ملے گی۔

مرکزی بینک کے جاری کردہ اعلامیے میں بتایا گیا ہے کہ اس پیکج میں آر ایس ایف پروگرام کے تحت 154 ملین اسپیشل ڈرائنگ رائٹس (ایس ڈی آر) بھی شامل ہیں۔ ماہرین کے مطابق یہ فنڈز نہ صرف معاشی استحکام کیلئے اہم ہیں بلکہ عالمی مالیاتی اداروں کے اعتماد کا اظہار بھی سمجھے جا رہے ہیں۔

واضح رہے کہ آئی ایم ایف کے ایگزیکٹو بورڈ نے 8 مئی کو پاکستان کیلئے قرض پروگرام کی منظوری دی تھی، جس کے بعد فنڈز کی منتقلی مکمل کی گئی۔

معاشی تجزیہ کاروں کا کہنا ہے کہ موجودہ صورتحال میں زرمبادلہ کے ذخائر میں اضافہ حکومت کیلئے ایک مثبت اشارہ ہے، کیونکہ پاکستان کو اس وقت بیرونی قرضوں کی ادائیگی اور درآمدی ضروریات جیسے چیلنجز کا سامنا ہے۔ ان کے مطابق آئی ایم ایف پروگرام کے تسلسل سے نہ صرف عالمی سطح پر پاکستان کی ساکھ بہتر ہوگی بلکہ سرمایہ کاروں کے اعتماد میں بھی اضافہ متوقع ہے۔

ماہرین یہ بھی کہتے ہیں کہ اگر حکومت مالیاتی نظم و ضبط برقرار رکھنے اور معاشی اصلاحات پر عمل جاری رکھتی ہے تو آنے والے مہینوں میں معیشت میں مزید بہتری دیکھی جا سکتی ہے۔