واٹس ایپ ویب میں گروپ آڈیو اور ویڈیو کالنگ فیچر متعارف کرانے کی تیاری

میٹا کے زیرِ ملکیت مقبول میسجنگ پلیٹ فارم واٹس ایپ اپنے ویب ورژن میں ایک اہم نیا فیچر شامل کرنے پر کام کر رہا ہے، جس کے ذریعے صارفین گروپ آڈیو اور ویڈیو کالز بھی کر سکیں گے۔

اب تک واٹس ایپ ویب پر صرف انفرادی (ون آن ون) وائس اور ویڈیو کالز کی سہولت دستیاب تھی، تاہم نئی پیش رفت کے بعد گروپ چیٹس کے اندر بھی کالنگ کا آپشن فراہم کیا جا رہا ہے۔

رپورٹس کے مطابق یہ فیچر فی الحال واٹس ایپ ویب کے بیٹا ورژن میں محدود صارفین کے لیے دستیاب ہے۔ اس کی مدد سے ایک ہی وقت میں 32 افراد تک گروپ آڈیو یا ویڈیو کال میں شامل ہو سکیں گے۔ تمام کالز کو اینڈ ٹو اینڈ انکرپشن کے ذریعے محفوظ بنایا جائے گا۔

نئے فیچر میں اسکرین شیئرنگ کی سہولت بھی شامل ہوگی، جس سے صارفین کال کے دوران اپنی اسکرین دوسرے شرکاء کے ساتھ شیئر کر سکیں گے۔

فیچر کے عام اجرا کے بعد گروپ چیٹس میں ایک مخصوص کال بٹن نظر آئے گا، جس کے ذریعے صارفین آڈیو یا ویڈیو کال کا آغاز کر سکیں گے۔

اس کے علاوہ واٹس ایپ کال لنکس کا آپشن بھی فراہم کرے گا، جس کی مدد سے صارفین دوسروں کو کال میں شرکت کی دعوت دے سکیں گے۔ ہر کال لنک منفرد اور محفوظ ہوگا، جبکہ استعمال نہ ہونے کی صورت میں یہ 30 دن بعد خودکار طور پر غیر فعال ہو جائے گا۔

فی الحال یہ سہولت آزمائشی مرحلے میں ہے، تاہم توقع کی جا رہی ہے کہ آنے والے ہفتوں یا مہینوں میں اسے تمام صارفین کے لیے متعارف کرا دیا جائے گا۔