سعودی عرب میں نئے عمرہ سیزن کا آغاز، ویزا درخواستوں کی وصولی شروع

سعودی وزارتِ حج و عمرہ نے نئے عمرہ سیزن کے لیے ویزا درخواستیں وصول کرنا شروع کر دی ہیں۔ وزارت کے مطابق حج 1447 ہجری کے اختتام کے بعد دنیا بھر سے آنے والے عمرہ زائرین کی مملکت آمد کا سلسلہ دوبارہ شروع ہو چکا ہے۔
حکام کا کہنا ہے کہ عمرہ ویزوں کا اجرا 9 مارچ 2027 تک جاری رہے گا، جبکہ اس تاریخ کے بعد نئے عمرہ ویزے جاری نہیں کیے جائیں گے۔ بیرونِ ملک سے آنے والے زائرین 23 مارچ 2027 تک سعودی عرب میں داخل ہو سکیں گے، جبکہ تمام عمرہ زائرین کو 7 اپریل 2027 تک مملکت سے روانہ ہونا ہوگا۔
وزارتِ حج و عمرہ کے مطابق زائرین مکہ مکرمہ میں داخلے اور عمرہ کی ادائیگی کے لیے درکار پرمٹس ’’نسک‘‘ ایپ کے ذریعے حاصل کر سکیں گے۔ یہ ڈیجیٹل پلیٹ فارم حج و عمرہ سے متعلق مختلف خدمات، بکنگ، رہنمائی اور اجازت ناموں کی فراہمی کے لیے استعمال کیا جاتا ہے۔
سعودی عرب نے حالیہ برسوں میں عمرہ خدمات کو جدید ٹیکنالوجی سے ہم آہنگ بنانے کے لیے متعدد اقدامات کیے ہیں۔ نسک پلیٹ فارم کے ذریعے الیکٹرانک اجازت نامے، خودکار نظام اور کیو آر کوڈ تصدیق جیسی سہولیات متعارف کرائی گئی ہیں، جن کا مقصد زائرین کے سفر کو زیادہ منظم اور آسان بنانا ہے۔
سعودی وژن 2030 کے تحت حکومت حج و عمرہ کے شعبے میں مزید بہتری کے لیے ٹرانسپورٹ، رہائش اور بنیادی ڈھانچے کے مختلف منصوبوں پر کام کر رہی ہے۔ حکام کے مطابق ان اقدامات کا مقصد مستقبل میں بڑھتی ہوئی تعداد میں آنے والے زائرین کو بہتر سہولیات فراہم کرنا اور ان کے مذہبی سفر کو مزید سہل بنانا ہے۔