دنیا کی سب سے چوڑی سڑک کہاں واقع ہے؟

دنیا کی سب سے چوڑی سڑک کے بارے میں بہت کم لوگ جانتے ہیں، تاہم یہ اعزاز ارجنٹینا کے دارالحکومت میں واقع “9 جولائی ایونیو” کو حاصل ہے۔

یہ شاہراہ اپنی غیرمعمولی چوڑائی اور تاریخی اہمیت کے باعث دنیا بھر میں مشہور ہے۔ 20ویں صدی کے اوائل میں بیونس آئرس کو “جنوبی امریکا کا پیرس” کہا جاتا تھا، اور اسی تشخص کو مزید مضبوط بنانے کے لیے شہر میں کئی بڑے ترقیاتی منصوبے شروع کیے گئے۔

ان منصوبوں میں 9 جولائی ایونیو بھی شامل تھی، جسے فرانس کے معروف شانزے الیزے ایونیو سے متاثر ہو کر ڈیزائن کیا گیا۔ تاہم مقامی منصوبہ سازوں نے اسے محض ایک نقل تک محدود نہیں رکھا بلکہ ایک ایسی شاہراہ بنانے کا ہدف مقرر کیا جو دنیا بھر میں منفرد پہچان حاصل کر سکے۔

اس سڑک کی تعمیر کا آغاز 1937 میں ہوا اور مختلف مراحل میں جاری رہنے کے بعد تقریباً نصف صدی میں مکمل ہوئی۔ منصوبے کے دوران شہری ڈھانچے، ٹریفک کی روانی اور متعدد عمارتوں کی منتقلی جیسے بڑے چیلنجز کا سامنا کرنا پڑا۔

بالآخر 1980 کی دہائی میں اس شاہراہ کی تعمیر مکمل ہوئی۔ تقریباً 140 میٹر چوڑی اور 16 لینز پر مشتمل یہ سڑک آج بھی دنیا کی سب سے چوڑی شاہراہوں میں شمار کی جاتی ہے اور اسے عالمی سطح پر ایک اہم شہری انجینئرنگ منصوبے کی مثال سمجھا جاتا ہے۔