خلیج میں طبلِ جنگ؟ سعودی عرب، عمان اور کویت کا ایرانی حملوں پر سخت ردعمل

سعودی عرب، عمان اور کویت نے حالیہ ایرانی حملوں کی مذمت کرتے ہوئے انہیں علاقائی سلامتی اور بین الاقوامی قوانین کے لیے خطرہ قرار دیا ہے۔
سعودی وزارت خارجہ کے مطابق ایسے اقدامات سے خطے میں کشیدگی بڑھنے کا خدشہ ہے اور عالمی بحری تجارت سمیت آبنائے ہرمز میں جہاز رانی کی آزادی متاثر ہو سکتی ہے۔ بیان میں کہا گیا کہ تجارتی جہازوں اور بحری راستوں کو نشانہ بنانا بین الاقوامی اصولوں کے منافی ہے۔ حالیہ واقعات کے دوران ایک سعودی آئل ٹینکر بھی متاثر ہونے کی اطلاعات سامنے آئی ہیں۔
ادھر عمان نے اپنی سرزمین پر ہونے والے حملے کو ناقابل قبول قرار دیتے ہوئے واضح کیا کہ وہ اپنی خودمختاری اور علاقائی سالمیت پر کسی بھی قسم کی جارحیت کو برداشت نہیں کرے گا۔ یہ ردعمل ایسے وقت میں سامنے آیا جب آبنائے ہرمز کی سلامتی سے متعلق سفارتی رابطے جاری تھے۔
کویت کی وزارت خارجہ نے بھی ایرانی حملوں کی مذمت کرتے ہوئے کہا کہ اس نوعیت کی کارروائیاں خطے کے امن و استحکام کے لیے خطرہ ہیں۔ بیان میں کہا گیا کہ بڑھتی ہوئی کشیدگی سفارتی کوششوں کو نقصان پہنچا سکتی ہے اور بحران کو مزید پیچیدہ بنا سکتی ہے۔
خلیجی ممالک نے مجموعی طور پر کشیدگی میں کمی، علاقائی استحکام اور مسائل کے حل کے لیے سفارتی مذاکرات کی ضرورت پر زور دیا۔