جیولری شاپ پر مسلح دھاوا، دو سال بعد فضائیہ کا اہلکار قانون کی گرفت میں

بھارت کی ریاست گجرات میں پولیس نے احمد آباد کی ایک معروف جیولری شاپ میں کروڑوں روپے مالیت کی ڈکیتی کے مقدمے میں بھارتی فضائیہ کے ایک کارپورل کو گرفتار کرنے کا دعویٰ کیا ہے۔
پولیس کے مطابق 31 سالہ کارپورل دیپک بھوکر، جو اس وقت دہلی میں بھارتی فضائیہ کے ایک یونٹ میں تعینات تھا، پر الزام ہے کہ اس نے جولائی 2024 میں احمد آباد کے مانیک چوک علاقے میں واقع ایک زیورات کی دکان میں مسلح ڈکیتی کی واردات کی۔ اس دوران مبینہ طور پر ایک کروڑ 51 لاکھ بھارتی روپے مالیت کے زیورات لوٹے گئے، جبکہ مزاحمت کرنے پر دکان کے مالک کو گولی مار کر زخمی کر دیا گیا۔
تحقیقات کے مطابق ملزم واردات کے بعد شہر سے فرار ہوگیا اور طویل عرصے تک قانون نافذ کرنے والے اداروں کی گرفت سے دور رہا۔ بعد ازاں پولیس نے دہلی میں کارروائی کرتے ہوئے اسے گرفتار کر لیا، جبکہ عدالت نے مزید تفتیش کے لیے ملزم کو آٹھ روزہ جسمانی ریمانڈ پر پولیس کے حوالے کر دیا ہے۔
پولیس حکام کا کہنا ہے کہ کیس میں اہم پیش رفت اس وقت ہوئی جب جام نگر میں ایک ریٹائرڈ فضائیہ افسر کے گھر سے چوری ہونے والے سروس ریوالور کا تعلق اسی واردات سے جوڑا گیا۔ اس کے بعد خصوصی تحقیقاتی ٹیمیں تشکیل دی گئیں، جنہوں نے دونوں مقدمات کا مشترکہ جائزہ لیا۔
سی سی ٹی وی فوٹیج اور دیگر شواہد کی مدد سے ملزم کی شناخت ممکن ہوئی۔ تفتیش میں یہ بھی معلوم ہوا کہ واردات کے وقت ملزم جام نگر ایئر فورس یونٹ میں تعینات تھا، جبکہ بعد میں اس کا تبادلہ دہلی کر دیا گیا تھا۔
پولیس کے مطابق ملزم کے قبضے سے واردات میں استعمال ہونے والا سروس ریوالور اور گولیاں بھی برآمد کر لی گئی ہیں۔ حکام کا کہنا ہے کہ ملزم گرفتاری سے بچنے کے لیے جعلی شناختی دستاویزات، مختلف موبائل نمبرز اور فرضی شناخت استعمال کرتا رہا، جبکہ شناخت سے بچنے کے لیے اپنی انگلیوں پر ٹیپ بھی لپیٹتا تھا۔
ابتدائی تحقیقات کے مطابق ملزم نے فرار کے دوران متعدد مرتبہ کپڑے تبدیل کیے اور مختلف آٹو رکشوں کے ذریعے اپنی نقل و حرکت چھپانے کی کوشش کی۔ پولیس کا کہنا ہے کہ ملزم اس سے قبل بھی جام نگر میں شراب سے متعلق ایک مقدمے میں گرفتار ہو چکا ہے۔
حکام کے مطابق اس گرفتاری کے بعد احمد آباد کی ڈکیتی اور جام نگر میں ریٹائرڈ فضائیہ افسر کے گھر میں ہونے والی چوری، دونوں مقدمات میں اہم پیش رفت حاصل ہوئی ہے، جبکہ مزید تحقیقات جاری ہیں۔