اسٹارشیلڈ میں خلل، یوکرینی ڈرونز کی کارروائیاں متاثر

یوکرین کی فوج کو امریکی سیٹلائٹ انٹرنیٹ سروس اسٹارشیلڈ میں مبینہ تکنیکی تبدیلیوں کے باعث ڈرون آپریشنز میں مشکلات کا سامنا کرنا پڑا ہے۔ یوکرینی حکام کے مطابق اس خلل سے لاکھوں ڈالر مالیت کے ڈرونز متاثر ہوئے، جبکہ روسی فوجی اہداف کے خلاف بعض کارروائیاں بھی کئی روز تک محدود رہیں۔

اطلاعات کے مطابق اسٹارشیلڈ سے رابطہ منقطع ہونے کے باعث روسی فوجی تنصیبات کی جانب پرواز کرنے والے بعض ڈرونز کا کنٹرول متاثر ہوا اور کئی ڈرون گر گئے۔ اس صورت حال کے باعث روسی کمانڈ پوسٹوں اور ایندھن کے مراکز کو نشانہ بنانے والے بعض فوجی یونٹس کو اپنی کارروائیاں روکنا پڑیں۔

یوکرینی فوجی حکام کا کہنا ہے کہ نئی پابندیوں کے تحت تیز رفتار ڈرونز کے لیے سیٹلائٹ رابطہ برقرار رکھنا مشکل ہوگیا ہے۔ اس تبدیلی سے روسی ڈرونز کو فضا میں روکنے کے لیے استعمال ہونے والے انٹرسیپٹر ڈرونز کی کارکردگی متاثر ہونے کا خدشہ بھی ظاہر کیا گیا ہے۔

یوکرینی صدر وولودیمیر زیلنسکی نے ان تبدیلیوں کو منصوبہ بند اقدام قرار دیتے ہوئے امریکا سے وضاحت طلب کی ہے۔ کیف کو خدشہ ہے کہ ان اقدامات کا تعلق جنگ کے خاتمے کے لیے سیاسی دباؤ سے ہوسکتا ہے۔

دوسری جانب امریکی حکام نے یوکرین کی مدد جان بوجھ کر محدود کرنے کے الزامات مسترد کیے ہیں۔ وزیر خارجہ مارکو روبیو کے مطابق سروس میں پیش آنے والی رکاوٹ دور کردی گئی تھی، جبکہ ایلون مسک کا کہنا ہے کہ اسٹارشیلڈ امریکی محکمہ دفاع کے کنٹرول میں ہے۔