ارشدیپ سنگھ کی منگنی کی انگوٹھی کی قیمت سامنے آگئی

بھارتی کرکٹ ٹیم کے فاسٹ بولر ارشدیپ سنگھ اور اداکارہ سمرین کور کی منگنی کے بعد ان کی قیمتی انگوٹھی بھی خبروں کی زینت بن گئی ہے۔ انگوٹھی کی مبینہ قیمت جان کر مداح حیران رہ گئے۔

میڈیا رپورٹس کے مطابق ارشدیپ سنگھ نے 11 نومبر 2026 کو نیوزی لینڈ میں سمرین کور کو شادی کی پیشکش کی، جس کے بعد دونوں نے سوشل میڈیا پر اپنی منگنی کی خوشخبری مداحوں کے ساتھ شیئر کی۔

منگنی کی تصاویر سامنے آنے کے بعد سمرین کور کی انگلی میں موجود انگوٹھی نے خاصی توجہ حاصل کی۔ جیولری ماہر اور سوشل میڈیا انفلوئنسر پریانشو گوئل کے مطابق یہ معروف لگژری برانڈ ٹفنی اینڈ کمپنی کی پلاٹینم انگیجمنٹ رنگ ہے۔

پریانشو گوئل کی جانب سے شیئر کی گئی معلومات کے مطابق اس انگوٹھی کی قیمت تقریباً 59 ہزار امریکی ڈالر ہے، جو بھارتی کرنسی میں لگ بھگ 55 لاکھ روپے بنتی ہے، جبکہ پاکستانی کرنسی میں اس کی مالیت تقریباً ایک کروڑ 63 لاکھ روپے کے برابر ہے۔ تاہم یہ قیمت سوشل میڈیا پر شیئر کی گئی معلومات پر مبنی ہے۔

جوڑے نے اپنی منگنی کے اعلان میں خوشی کا اظہار کرتے ہوئے بتایا کہ وہ ایک دوسرے کو اپنی زندگی میں پا کر خود کو خوش قسمت سمجھتے ہیں اور اب مستقبل ایک ساتھ گزارنے کے منتظر ہیں۔

یاد رہے کہ ارشدیپ سنگھ اور سمرین کور نے رواں سال اپنے تعلقات کو منظر عام پر لایا تھا۔ آئی پی ایل 2026 کے دوران بھی سمرین کو ارشدیپ کی حوصلہ افزائی کرتے دیکھا گیا تھا۔

دوسری جانب ارشدیپ سنگھ کے کرکٹ کیریئر میں بھی اہم تبدیلی سامنے آئی ہے۔ رپورٹس کے مطابق وہ آئی پی ایل 2027 میں پنجاب کنگز کے بجائے ممبئی انڈینز کی نمائندگی کریں گے، جہاں ان کا معاہدہ 18 کروڑ بھارتی روپے میں طے پانے کی اطلاعات ہیں۔

یوں ارشدیپ سنگھ کی زندگی میں ایک جانب ازدواجی سفر کا آغاز ہونے جا رہا ہے تو دوسری طرف کرکٹ کے میدان میں بھی ایک نئی ٹیم کے ساتھ ان کی نئی اننگز شروع ہونے والی ہے۔