پنجاب میں سیلاب سے تباہی، 7 افراد جاں بحق، کئی علاقے زیرِ آب

پنجاب کے مختلف علاقوں میں شدید بارشوں اور بھارت کی جانب سے پانی چھوڑنے کے باعث دریاؤں میں سیلابی صورتحال پیدا ہوگئی ہے، جس سے کئی علاقے متاثر ہوئے ہیں۔ دریائے راوی، چناب اور ستلج میں پانی کی سطح خطرناک حد کے قریب پہنچ چکی ہے۔

سیلاب کے نتیجے میں گوجرانوالہ ڈویژن میں 7 افراد جاں بحق ہو گئے ہیں، جبکہ 3 افراد لاپتہ ہیں۔ کمشنر گوجرانوالہ کے مطابق، جاں بحق ہونے والوں میں گجرات سے 3، سیالکوٹ سے 2 اور نارووال و گوجرانوالہ سے 1،1 فرد شامل ہے۔ سیالکوٹ کے علاقے سمبڑیال میں 3 افراد کے لاپتہ ہونے کی اطلاع بھی ہے۔

متعدد دیہات اور بستیاں پانی کی لپیٹ میں آ چکی ہیں، جبکہ سڑکیں دریا بن چکی ہیں، جس سے مقامی آبادی کو شدید مشکلات کا سامنا ہے۔ انتظامیہ امدادی سرگرمیوں میں مصروف ہے، تاہم متاثرہ علاقوں میں فوری ریلیف کی ضرورت بڑھتی جا رہی ہے۔