آئی سی سی ٹیسٹ رینکنگ: بابر اعظم کی ٹاپ 10 میں واپسی، عبداللہ شفیق کی بڑی چھلانگ

پاکستانی کھلاڑیوں نے ویسٹ انڈیز کے خلاف ٹیسٹ سیریز میں عمدہ کارکردگی کا مظاہرہ کرنے کے بعد تازہ آئی سی سی رینکنگ میں نمایاں بہتری حاصل کرلی۔

پاکستان کے کپتان بابر اعظم تقریباً دو سال بعد ایک مرتبہ پھر ٹیسٹ بیٹرز کی ٹاپ 10 فہرست میں شامل ہوگئے ہیں۔ بابر نے ویسٹ انڈیز کے خلاف دوسرے ٹیسٹ کی پہلی اننگز میں 88 رنز بنائے جبکہ دوسری اننگز میں ناقابلِ شکست 24 رنز کے ساتھ ٹیم کی فتح میں اہم کردار ادا کیا۔

تازہ رینکنگ میں بابر اعظم نے 5 درجے بہتری حاصل کرتے ہوئے 10ویں پوزیشن سنبھال لی ہے۔ وہ ستمبر 2024 کے بعد پہلی بار ٹیسٹ بیٹرز کی ٹاپ 10 میں واپس آئے ہیں۔

دوسری جانب عبداللہ شفیق نے بھی شاندار پیش رفت کی۔ دوسرے ٹیسٹ میں ناقابلِ شکست 160 رنز کی اننگز کھیلنے والے پاکستانی اوپنر 25 درجے اوپر آکر 32ویں نمبر پر پہنچ گئے۔

اسپنر ساجد خان کی رینکنگ میں بھی بہتری آئی ہے۔ انہوں نے ٹیسٹ بولرز کی فہرست میں 5 درجے ترقی کرتے ہوئے 30ویں پوزیشن حاصل کی، جبکہ آل راؤنڈرز کی رینکنگ میں بھی 5 درجے بہتری کے بعد 32ویں نمبر پر آگئے۔

ٹیسٹ بیٹرز کی عالمی رینکنگ میں آسٹریلیا کے ٹریوس ہیڈ بدستور پہلے نمبر پر ہیں۔ بولرز میں بھارت کے جسپریت بمراہ جبکہ آل راؤنڈرز میں رویندرا جڈیجا نے اپنی پہلی پوزیشن برقرار رکھی ہے۔

ون ڈے رینکنگ میں بھی افغانستان اور آئرلینڈ کی حالیہ سیریز کے بعد تبدیلیاں ہوئی ہیں۔ افغانستان کے رحمان اللہ گرباز 3 درجے ترقی کرکے 11ویں نمبر پر پہنچ گئے، جبکہ حشمت اللہ شاہدی 4 درجے بہتری کے بعد 50ویں پوزیشن پر آگئے۔

افغانستان کے کپتان راشد خان نے آئرلینڈ کے خلاف عمدہ کارکردگی کے باعث ون ڈے بولرز کی رینکنگ میں اپنی پہلی پوزیشن مزید مضبوط کرلی۔ سیریز کے دوسرے میچ میں ان کی 6 وکٹوں کی کارکردگی بھی اس کامیابی کا اہم حصہ رہی۔

آئرلینڈ کے آل راؤنڈر کرٹس کیمفر بھی رینکنگ میں دوبارہ شامل ہوگئے ہیں اور مشترکہ طور پر 59ویں نمبر پر ہیں، جبکہ فاسٹ بولر مارک ایڈیئر نے بھی واپسی کرتے ہوئے 17ویں پوزیشن حاصل کرلی ہے۔