“5 ہزار کے نوٹ ختم؟ گورنر اسٹیٹ بینک نے گردش کرنے والی افواہوں کو بالکل مسترد کر دیا”

اسلام آباد میں سینیٹ کی قائمہ کمیٹی برائے خزانہ کے اجلاس کے دوران ملک میں نئے ڈیزائن کے کرنسی نوٹوں کے حوالے سے اہم معلومات سامنے آئیں۔
گورنر اسٹیٹ بینک نے کمیٹی کو بتایا کہ 10 روپے سے لے کر 5 ہزار روپے تک کے تمام نوٹوں کے نئے ڈیزائن مکمل کر لیے گئے ہیں اور متعلقہ تجاویز وزارتِ خزانہ کو بھیج دی گئی ہیں۔ انہوں نے مزید کہا کہ نئے نوٹوں پر جدید سیکیورٹی فیچرز شامل کیے گئے ہیں تاکہ جعلی کرنسی کے استعمال کو روکنے میں مدد مل سکے۔
اجلاس کے دوران گورنر نے واضح کیا کہ 5 ہزار روپے کے نوٹ کو ختم کرنے کا کوئی منصوبہ زیر غور نہیں ہے اور اس بارے میں گردش کرنے والی خبریں درست نہیں ہیں۔ انہوں نے کہا کہ نئے نوٹوں کے حوالے سے حتمی فیصلہ وفاقی کابینہ کرے گی، جو اس وقت اس معاملے پر غور کر رہی ہے۔
کمیٹی کے چیئرمین نے نئے ڈیزائن کی تیاری کے طریقہ کار کے بارے میں سوال کیا، جس پر گورنر نے بتایا کہ آئندہ اجلاس میں کمیٹی کو ان کیمرہ بریفنگ دی جا سکتی ہے، جہاں نوٹوں کے نمونے بھی پیش کیے جائیں گے۔
گورنر نے کہا کہ فی الوقت وفاقی کابینہ کی جانب سے کوئی حتمی فیصلہ نہیں ہوا، تاہم جلد اس سلسلے میں پیش رفت متوقع ہے۔