پٹرول بحران کا خدشہ! ہڑتال سے قبل ڈیلرز کے تین بڑے مطالبات سامنے آگئے

اسلام آباد: ملک بھر کے پٹرول پمپ مالکان نے حکومت کو خبردار کیا ہے کہ اگر ان کے مطالبات منظور نہ کیے گئے تو آج رات 12 بجے سے ملک گیر ہڑتال شروع کرتے ہوئے پٹرول پمپس بند کر دیے جائیں گے۔

پٹرولیم ڈیلرز کی مختلف تنظیموں نے مشترکہ مؤقف اختیار کرتے ہوئے حکومت کے سامنے تین اہم مطالبات رکھے ہیں۔ ان کا کہنا ہے کہ موجودہ منافع کا مارجن ناکافی ہے، اس لیے اسے 2.6 فیصد سے بڑھا کر 8 فیصد کیا جائے۔

ڈیلرز کا دوسرا مطالبہ یہ ہے کہ پٹرولیم مصنوعات کی قیمتوں کا تعین روزانہ کرنے کے بجائے دوبارہ 15 روزہ یا ماہانہ بنیادوں پر کیا جائے تاکہ کاروباری غیر یقینی صورتحال کم ہو سکے۔

تیسرے مطالبے میں آئل مارکیٹنگ کمپنیوں کے نافذ کردہ کوٹہ سسٹم کو ختم کرنے کا مطالبہ کیا گیا ہے، جسے ڈیلرز اپنے کاروبار کے لیے مشکلات کا باعث قرار دیتے ہیں۔

واضح رہے کہ حال ہی میں حکومت نے پٹرول اور ہائی اسپیڈ ڈیزل کی قیمتوں کے روزانہ تعین کا نظام متعارف کرایا تھا، جس کے تحت نئی قیمتیں متعلقہ ریگولیٹری ادارے کی جانب سے روزانہ جاری کی جاتی ہیں۔

ڈیلرز کا مؤقف ہے کہ نئی پالیسی سے کاروباری سرگرمیوں پر منفی اثرات مرتب ہو رہے ہیں، جبکہ ٹرانسپورٹ کے شعبے میں بھی ایندھن کی قیمتوں میں تبدیلی کے باعث کرایوں میں اضافہ دیکھنے میں آیا ہے۔

پٹرولیم ڈیلرز نے واضح کیا ہے کہ اگر حکومت نے ان کے مطالبات پر سنجیدگی سے غور نہ کیا تو ملک بھر میں ہڑتال پر عمل درآمد کیا جائے گا، جس سے پٹرول کی فراہمی متاثر ہونے کا امکان ہے۔