فٹبال سے کاروبار تک، رونالڈو کی دولت میں تاریخی اضافہ

پرتگال کے اسٹار فٹبالر کرسٹیانو رونالڈو نے مالی کامیابی کا ایک اور اہم سنگ میل عبور کر لیا ہے۔ مختلف مالیاتی تخمینوں کے مطابق ان کے خالص اثاثوں کی مالیت تقریباً 1.2 ارب ڈالر تک پہنچ چکی ہے، جبکہ وہ مسلسل تیسرے سال دنیا کے سب سے زیادہ آمدنی حاصل کرنے والے کھلاڑیوں میں سرفہرست ہیں۔

رپورٹس کے مطابق گزشتہ بارہ ماہ کے دوران رونالڈو نے تقریباً 300 ملین ڈالر کمائے، جس کے مطابق ان کی آمدنی میں اوسطاً ہر منٹ 570 ڈالر سے زائد کا اضافہ ہوا۔

رونالڈو کی آمدنی میں نمایاں اضافہ سعودی عرب کے فٹبال کلب النصر میں شمولیت کے بعد دیکھنے میں آیا۔ بعد ازاں کلب کے ساتھ معاہدے میں توسیع کے بعد ان کی سالانہ آمدنی میں مزید اضافہ ہوا، جس نے انہیں کھیلوں کی دنیا کے سب سے زیادہ معاوضہ لینے والے کھلاڑیوں میں شامل رکھا۔

فٹبال کے علاوہ رونالڈو کی آمدنی کا بڑا حصہ عالمی برانڈز کے ساتھ اشتہاری معاہدوں، ذاتی برانڈ، ہوٹل، فیشن، فٹنس اور دیگر کاروباری منصوبوں سے حاصل ہوتا ہے۔ سوشل میڈیا پر ان کے تقریباً ایک ارب فالوورز بھی انہیں دنیا کے بااثر ترین کھلاڑیوں میں شمار کرتے ہیں، جس کی وجہ سے بڑی کمپنیاں انہیں اپنی تشہیری مہمات کے لیے ترجیح دیتی ہیں۔

مالیاتی تجزیوں کے مطابق رونالڈو کھیلوں کی تاریخ کے ان چند کھلاڑیوں میں شامل ہیں جن کی مجموعی پیشہ ورانہ آمدنی دو ارب ڈالر سے تجاوز کر چکی ہے، جبکہ وہ ارب پتی ایتھلیٹس کی فہرست میں بھی شامل ہیں۔

اگرچہ پرتگال حالیہ فیفا ورلڈ کپ 2026 میں ٹائٹل حاصل کرنے میں کامیاب نہ ہو سکا، تاہم 41 سالہ رونالڈو نے ابھی تک ریٹائرمنٹ کا اعلان نہیں کیا۔ فٹبال ماہرین کا ماننا ہے کہ اگر ان کی فٹنس برقرار رہی تو وہ آئندہ برسوں میں بھی پیشہ ورانہ فٹبال کھیلتے ہوئے مزید ریکارڈ قائم کر سکتے ہیں۔