واٹس ایپ میں یوزر نیم فیچر متعارف کرانے کی تیاری، فون نمبر شیئر کیے بغیر رابطہ ممکن

میٹا کی زیرِ ملکیت میسجنگ ایپ واٹس ایپ نے ایک نئے فیچر کی تیاری کا اعلان کیا ہے، جس کے تحت صارفین مستقبل میں اپنا فون نمبر ظاہر کیے بغیر بھی دیگر افراد سے رابطہ قائم کر سکیں گے۔

اس نئے نظام میں صارفین کو ایک منفرد یوزر نیم منتخب کرنے کی سہولت دی جائے گی، جسے استعمال کرتے ہوئے دوسرے لوگ انہیں واٹس ایپ پر تلاش کر کے پیغام بھیج سکیں گے، جبکہ فون نمبر نجی رہے گا۔ البتہ اکاؤنٹ بنانے اور تصدیق کے لیے فون نمبر کی ضرورت بدستور برقرار رہے گی۔

کمپنی کے مطابق یوزر نیم زیادہ سے زیادہ 35 حروف پر مشتمل ہوگا اور ہر صارف کے لیے منفرد ہوگا۔ اگر منتخب کیا گیا نام پہلے سے کسی اور کے زیرِ استعمال ہوگا تو ایپ متبادل نام منتخب کرنے کی ہدایت دے گی۔

واٹس ایپ کا کہنا ہے کہ یہ فیچر ان صارفین کے لیے مفید ثابت ہوگا جو اپنی ذاتی معلومات کو محفوظ رکھتے ہوئے محدود افراد سے رابطہ رکھنا چاہتے ہیں۔ اس مقصد کے لیے صارفین ایپ کی سیٹنگز میں جا کر اپنے اکاؤنٹ کے تحت یوزر نیم منتخب کر سکیں گے، بشرطیکہ ان کے پاس واٹس ایپ کا تازہ ترین ورژن موجود ہو۔

کمپنی نے واضح کیا ہے کہ اس سہولت کا استعمال لازمی نہیں ہوگا۔ جو صارفین چاہیں، وہ پہلے کی طرح صرف فون نمبر کے ذریعے بھی واٹس ایپ استعمال کر سکیں گے۔

واٹس ایپ نے یہ بھی بتایا ہے کہ جعل سازی اور دھوکہ دہی کی روک تھام کے لیے معروف شخصیات اور اعلیٰ سرکاری عہدیداروں کے نام عام صارفین کے لیے بطور یوزر نیم دستیاب نہیں ہوں گے۔ اس کے علاوہ مشکوک سرگرمیوں کی نگرانی کے لیے حفاظتی اقدامات بھی شامل کیے جائیں گے، جبکہ صارفین کو شکایت درج کرانے کی سہولت بھی فراہم ہوگی۔

کمپنی کے مطابق یہ فیچر آئندہ چند ماہ کے دوران مرحلہ وار دنیا بھر کے صارفین تک پہنچایا جائے گا اور واٹس ایپ بزنس میں بھی دستیاب ہوگا۔ اگر کسی صارف کو یہ فیچر فوری طور پر نظر نہ آئے تو اسے ایپ کو اپ ڈیٹ رکھنے اور مرحلہ وار رول آؤٹ کا انتظار کرنے کی ہدایت کی گئی ہے۔

اس اعلان پر صارفین کی جانب سے مختلف آراء سامنے آئی ہیں۔ بعض افراد نے اسے پرائیویسی کے حوالے سے اہم پیش رفت قرار دیا ہے، جبکہ کچھ صارفین نے یوزر نیم کے غلط استعمال اور جعلی اکاؤنٹس سے متعلق خدشات کا اظہار بھی کیا ہے۔