امن معاہدے کے بعد ایرانی فٹبال ٹیم امریکا پہنچ گئی، ورلڈ کپ مہم کا آغاز آج

لاس اینجلس: ایران کی قومی فٹبال ٹیم فیفا ورلڈ کپ 2026 میں اپنے پہلے میچ کے لیے امریکا پہنچ گئی ہے۔ ٹیم اتوار کو میکسیکو کے شہر تیجوانا سے لاس اینجلس پہنچی، جہاں وہ پیر کو نیوزی لینڈ کے خلاف اپنے گروپ مرحلے کی مہم کا آغاز کرے گی۔

ایرانی ٹیم کی آمد ایسے وقت میں ہوئی ہے جب امریکا اور ایران کے درمیان حالیہ کشیدگی کے بعد امن معاہدے کے اعلان نے عالمی توجہ حاصل کر رکھی ہے۔ اس تناظر میں ایران اور نیوزی لینڈ کے درمیان ہونے والے میچ کو بھی غیر معمولی اہمیت دی جا رہی ہے۔

لاس اینجلس پہنچنے کے بعد ایرانی ہیڈ کوچ امیر قلعی نویی نے کہا کہ انہیں اپنی قوم کی نمائندگی پر فخر ہے۔ ان کے مطابق فٹبال مختلف ثقافتوں اور ممالک کو قریب لانے کا مؤثر ذریعہ بن سکتا ہے۔

رپورٹس کے مطابق ایران نے سکیورٹی اور انتظامی وجوہات کی بنا پر اپنا ورلڈ کپ بیس کیمپ امریکا سے منتقل کرکے میکسیکو میں قائم کیا تھا۔ اب ٹیم کو اپنے گروپ میچز کے لیے میکسیکو اور امریکا کے درمیان سفر کرنا ہوگا۔

تیجوانا میں روانگی سے قبل شائقین کی بڑی تعداد نے ایرانی ٹیم کو الوداع کہا اور نعرے لگا کر اپنی حمایت کا اظہار کیا۔ متعدد مداح بینرز اور جھنڈے اٹھائے ہوئے تھے جبکہ کھلاڑیوں نے بھی انکا شکریہ ادا کیا۔

لاس اینجلس ایران سے باہر ایرانی نژاد افراد کی بڑی آبادی کا مرکز سمجھا جاتا ہے، جس کے باعث ٹیم کو وہاں بھی بھرپور حمایت ملنے کی توقع ہے۔

تاریخی اعتبار سے یہ ایک منفرد موقع قرار دیا جا رہا ہے کیونکہ ورلڈ کپ کی تاریخ میں شاذونادر ہی ایسا ہوا ہے کہ کوئی میزبان ملک حالیہ کشیدگی یا تنازع کے پس منظر میں کسی ایسی قومی ٹیم کی میزبانی کر رہا ہو جس کے ساتھ اس کے تعلقات حال ہی میں تناؤ کا شکار رہے ہوں۔