انگلینڈ فٹبال ٹیم کے سامان کی چوری، ورلڈ کپ تیاریوں پر اثر پڑنے کا خدشہ

فیفا ورلڈ کپ میں اپنے پہلے میچ سے قبل انگلینڈ فٹبال ٹیم کو ایک غیر متوقع صورتحال کا سامنا کرنا پڑا ہے۔ میڈیا رپورٹس کے مطابق امریکا کے شہر کنساس سٹی میں ٹیم کے سامان کی منتقلی کے دوران ایک گاڑی سے سامان چوری ہونے کا واقعہ پیش آیا۔

اطلاعات کے مطابق نامعلوم افراد نے گاڑی کے تالے توڑ کر سامان نکال لیا۔ چوری شدہ اشیا میں کھلاڑیوں کے تربیتی جوتے، فٹبالز اور دیگر کھیلوں کا سامان شامل ہونے کا امکان ظاہر کیا جا رہا ہے، تاہم حکام ابھی مکمل تفصیلات جمع کر رہے ہیں۔

رپورٹس کے مطابق انگلینڈ ٹیم کی آمد سے قبل سامان کنساس سٹی پہنچایا گیا تھا، جبکہ کوچنگ اسٹاف اور کھلاڑیوں کی آمد ہفتے کو متوقع تھی۔

پولیس نے واقعے کی تحقیقات شروع کر دی ہیں اور فٹبال حکام کے ساتھ رابطے میں ہے۔ ذرائع کے مطابق چوری کے شبے میں دو افراد کو حراست میں لیا گیا ہے۔

ماہرین کا کہنا ہے کہ اگر ضروری سامان بروقت دستیاب نہ ہو سکا تو اس سے ٹیم کی ابتدائی تیاریوں پر اثر پڑ سکتا ہے۔ انگلینڈ کی ٹیم اپنا پہلا تربیتی سیشن اتوار کو کرے گی جبکہ افتتاحی میچ میں اس کا مقابلہ کروشیا سے متوقع ہے۔