ملک میں سونے کی قیمتوں میں بڑا اضافہ، فی تولہ نرخ نئی بلند سطح پر پہنچ گئے

پاکستان میں سونے کی قیمتوں میں ایک مرتبہ پھر نمایاں اضافہ دیکھنے میں آیا ہے، جس کے نتیجے میں مقامی مارکیٹ میں فی تولہ سونے کی قیمت نئی بلند سطح تک پہنچ گئی۔
صرافہ بازار سے موصول ہونے والے اعداد و شمار کے مطابق فی تولہ سونے کی قیمت میں 7 ہزار 250 روپے کا اضافہ ریکارڈ کیا گیا، جس کے بعد اس کا نرخ 4 لاکھ 39 ہزار 966 روپے ہو گیا۔ اسی طرح 10 گرام سونے کی قیمت 6 ہزار 525 روپے بڑھنے کے بعد 3 لاکھ 75 ہزار 947 روپے تک جا پہنچی۔
عالمی سطح پر بھی سونے کی قیمتوں میں تیزی کا رجحان برقرار رہا۔ بین الاقوامی مارکیٹ میں فی اونس سونا 72 ڈالر مہنگا ہو کر 4 ہزار 175 ڈالر کی سطح پر پہنچ گیا، جس کے اثرات مقامی مارکیٹ میں بھی نمایاں طور پر محسوس کیے گئے۔