آف کام کی رپورٹ: سوشل میڈیا پر بچوں کو نقصان دہ مواد تک رسائی برقرار

برطانیہ کے ریگولیٹری ادارے آف کام نے کہا ہے کہ سوشل میڈیا پلیٹ فارمز ٹک ٹاک اور یوٹیوب اپنے اس وعدے کو پورا کرنے میں ناکام رہے ہیں جس کے تحت بچوں کے لیے نقصان دہ مواد میں کمی لانا تھی۔
آف کام کے مطابق جولائی 2025 میں نافذ کیے گئے آن لائن تحفظ کے نئے قوانین کے باوجود صورتحال میں نمایاں بہتری نہیں آئی اور بچے اب بھی نقصان دہ مواد تک آسانی سے رسائی حاصل کر رہے ہیں۔
ادارے کی رپورٹ میں بتایا گیا ہے کہ 11 سے 17 سال کے 35 فیصد بچوں نے اعتراف کیا کہ انہیں سکرولنگ کے دوران نقصان دہ مواد نظر آیا۔ اسی عمر کے گروپ میں 53 فیصد نے ٹک ٹاک، 36 فیصد نے یوٹیوب، 34 فیصد نے انسٹاگرام اور 31 فیصد نے فیس بک پر ایسا مواد دیکھنے کی اطلاع دی۔
نومبر اور دسمبر 2025 کے ایک سروے کے مطابق ہر 10 میں سے 7 بچے آن لائن نقصان دہ مواد کا سامنا کر چکے ہیں۔ مزید یہ کہ 8 سے 12 سال کی عمر کے 84 فیصد بچے اب بھی ان بڑی سوشل میڈیا سروسز کا استعمال کر رہے ہیں، حالانکہ ان پلیٹ فارمز کے لیے کم از کم عمر 13 سال مقرر ہے۔
آف کام نے کہا ہے کہ صورتحال تشویشناک ہے اور اس نے میٹا، ٹک ٹاک اور یوٹیوب سے مزید تفصیلی معلومات طلب کی ہیں تاکہ یہ سمجھا جا سکے کہ بچے کس طرح اس مواد تک پہنچ رہے ہیں اور اسے روکنے کے لیے مزید کیا اقدامات ضروری ہیں۔