آبنائے ہرمز میں ایران کی کارروائی، دو جہاز تحویل میں

ایران کی پاسدارانِ انقلاب کی بحریہ نے آبنائے ہرمز میں کارروائی کرتے ہوئے دو جہازوں کو اپنی تحویل میں لے لیا اور انہیں ایرانی ساحل کی جانب منتقل کر دیا۔ حکام کے مطابق یہ اقدام سمندری سیکیورٹی کو برقرار رکھنے کے لیے کیا گیا۔
ایرانی حکام کا کہنا ہے کہ آبنائے ہرمز میں امن و امان کی صورتحال ان کے لیے نہایت اہم ہے اور کسی بھی قسم کی خلاف ورزی کو برداشت نہیں کیا جائے گا۔ ان کے مطابق یہ علاقہ ایران کی سیکیورٹی پالیسی میں “ریڈ لائن” کی حیثیت رکھتا ہے۔
اس پیش رفت سے قبل بھی خطے میں کشیدگی دیکھی گئی تھی۔ اطلاعات کے مطابق ایک جہاز پر ایران کے قریب فائرنگ کی گئی، جبکہ عمان کے ساحل کے قریب ایک اور جہاز کو حملے میں نقصان پہنچا تھا۔
آبنائے ہرمز عالمی تجارت کے لیے ایک اہم سمندری راستہ ہے، جہاں سے بڑی مقدار میں تیل اور گیس کی ترسیل ہوتی ہے۔ حالیہ واقعات کے بعد اس اہم گزرگاہ میں سیکیورٹی خدشات میں مزید اضافہ ہو گیا ہے۔